Ykdysady diplomatiýa ugry boýunça okuw sapagy
Berkarar döwletiň täze eýýamynyň Galkynyşy döwründe ähli ugurlar bilen birlikde Türkmenistanyň ykdysady diplomatiýasyny ösdürmek boýunça hem birnäçe işler ýerine ýetirilýär. 2023-nji ýylyň 10-njy martynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň “Ykdysady diplomatiýa” ugry boýunça Türkmen döwlet ykdysadyýet we dolandyryş institutynyň talyplaryna “Logistika” atly temadan okuw sapagy geçirildi.
Okuw sapagyny Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary kafedrasynyň dosenti, teh.y.k. Öwezmyrat Bäşimow alyp bardy.
Logistika adalgasy häzirki döwürde ulaglar ulgamynyň sazlaşykly ösüşini üpjün etmekde örän ýerliklidir. Halkara hyzmatdaşlygynda logistika önümiň harydyň we hyzmatyň dolandyryş ulgamyny ulaglar bilen daşalşyny sazlaşdyrmak, ulgamlaşdyrmak ýaly toplumlaýyn işleriň kesgitlemesi hökmünde garalýar. Sapagyň dowamynda Türkmenistanda logistikanyň kemala gelmegi, onuň ösmegi, taryhy döwürleri barada talyplara giňişleýin maglumatlar berildi.
Sapagyň dowamynda Halkara ykdysady gatnaşyklary fakultetiniň I ýyl talyby Abdyresul Nurberdiýew özüniň “Aşgabat şäheriniň awtobus gatnawyny logistikanyň nukdaýnazaryndan gurnamak” atly ylmy işiniň I tapgyry boýunça çykyş etdi. Sapagyň ahyrynda talyplar özlerini gyzyklandyrýan birnäçe sowallar bilen mugallyma we talyba ýüzlenip, öz bilimlerini artdyrdylar.
Gyzylgül GURBANMUHAMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň mugallymy.