ÝHHG-niň gurnamagynda geçirilen maslahat
2021-nji ýylyň 21–22-nji oktýabry aralygynda Türkmenistanyň Daşary işler ministrliginiň Halkara gatnaşyklary institutynda Ýewropada Howpsuzlyk we Hyzmatdaşlyk Guramasynyň (ÝHHG) Aşgabatdaky Merkezi tarapyndan Türkmenistanyň Daşary işler ministrliginiň, Türkmenistanyň Energetika ministrliginiň, Türkmenistanyň Maliýe we ykdysadyýet ministrliginiň, Türkmenistanyň Söwda we daşary ykdysady aragatnaşyklar ministrliginiň, “Türkmengaz” döwlet konserniň, “Türkmennebit” döwlet konserniň, Türkmenistanyň Daşary işler ministriliginiň Halkara gatnaşyklary institutynyň, Türkmenistanyň Döwlet energetika institutynyň, Hazar deňzi institutynyň wekilleriniň gatnaşmagynda wideoaragatnaşyk arkaly “Nebit we gaz pudagynda energetika diplomatiýasy” atly okuw maslahaty geçirildi.
Bu maslahatyň esasy maksady Türkmenistanyň energetika diplomatiýasyny ösdürmegiň 2021–2025-nji ýyllar üçin Maksatnamasyny durmuşa geçirmekden, energetika pudagynda halkara ileri tutulýan ugurlara syn bermekden, global we sebitleýin tendensiýalary seljermekden, nebit-gaz pudagynyň halkara energiýa howpsuzlygy we durnukly ösüşini öwrenmekden ybarat bolup durýar.
Maslahatda nebit we gaz pudagyna degişli birnäçe toplumlaýyn maksatnamalara garaldy we birnäçe meseleler boýunça çykyşlar edildi. Okuw maslahatynda oňa gatnaşan professor-mugallymlaryň, alymlaryň we bilermenleriň pikirleri diňlenildi, nukdaýnazarlary we teklipleri ara alnyp maslahatlaşyldy. Şeýlelikde, bu geçirilen okuw maslahaty hormatly Prezidentimiziň energetika diplomatiýasy babatda alyp barýan oňyn syýasatynyň subutnamasyna öwrüldi.
Arslan SYÝAHATOW,
Türkmenistanyň Daşary işler
ministrliginiň
Halkara gatnaşyklary
institutynyň
Halkara gatnaşyklary
fakultetiniň I ýyl talyby.