Ýaşululara sarpa — paýhasa hormat
Ynsanperwerligiň belent ýörelgelerini özünde jemleýän baýram — Ýaşulularyň halkara güni dünýäniň dürli ýurtlarynda bolşy ýaly, biziň ýurdumyzda hem agzybirlik we ruhubelentlik bilen dabaraly bellenilip geçilýär. 2024-nji ýylyň 1-nji oktýabrynda Türkmenistanyň Daşary işler ministrliginiň Halkara gatnaşyklary institutynda geljekki halkaraçy hünärmenleri milli gymmatlyklarymyzyň, watansöýüjiligiň belent ruhunda terbiýelemekde, olarda dostluk, birek-birege hormat goýmak, arassa ahlaklylyk, halallyk ýaly iň asylly häsiýetleri kemala getirmekde aýratyn hyzmatlary bitirýän, durmuşda ýagşy görelde görkezýän dilleri senaly ýaşuly nesliň wekillerine — halypa professor-mugallymlara Ýaşulularyň halkara güni mynasybetli gutlag sözleri aýdyldy.
Türkmen halkynyň Milli Lideri Gahryman Arkadagymyz: «Ýaşuly adamlara hormat goýmak biziň ata-baba gelýän milli däbimizdir. Şeýle ajaýyp däp-dessurlarymyza biz hemişe uly ähmiýet berýäris» diýip belleýär. Şoňa görä-de, Berkarar döwletiň täze eýýamynyň Galkynyşy döwründe tutumly işleriň üstünlikli amala aşyrylmagynda baý zähmet hem-de durmuş tejribesi bolan il sylagly ýaşulularyň beýik maksatlara, täze üstünliklere ruhlandyrýan dana pikirlerine, paýhasly maslahatlaryna aýratyn ähmiýet berilýär. Müňýyllyklardan gözbaşly bu ýörelgeler nesilleriň arasyndaky üznüksizligi üpjün etmek bilen, halkymyzy döredijilikli, beýik işlere ruhlandyrýar.
Mälim bolşy ýaly, 1990-njy ýylyň 14-nji dekabrynda Birleşen Milletler Guramasynyň Baş Assambleýasy adamzadyň belent ynsanperwer ýörelgelerini dabaralandyrýan möhüm sene hökmünde her ýylyň 1-nji oktýabryny «Ýaşulularyň halkara güni» diýip yglan etdi. Bu halkara baýram mynasybetli dünýäniň çar künjeginde baýramçylyk dabaralary, medeni-köpçülikleýin çäreler geçirilýär. Munuň özi halkara derejede il sylagly ýaşululara goýulýan sarpanyň aýdyň beýanydyr.
Ýeri gelende bellesek, şanly Garaşsyzlygymyzyň bosagasynda paýtagtymyzda üstünlikli geçen Halk Maslahatynyň nobatdaky mejlisine ýurdumyzyň ähli sebitlerinden ýaşuly nesliň uly toparynyň gatnaşmagy, il-ýurt bähbitli geňeş edilmegi döwletli ýörelgelerimiziň dabaralanýandygyny äleme äşgär etdi. Şol taryhy günde hormatly Prezidentimiziň Permany bilen, ildeşlerimiziň birnäçesine Türkmenistanyň «Hormatly il ýaşulusy» diýen at dakyldy.
Täze taryhy döwrümizde Gahryman Arkadagymyzyň hem-de Arkadagly Gahryman Serdarymyzyň alyp barýan beýik işleri parasatly ýaşulularymyzyň göwnüni galkyndyrýar. Goý, ýaşuly nesle şeýle belent sarpa goýýan Milli Liderimiziň hem-de hormatly Prezidentimiziň janlary sag, il-ýurt bähbitli işleri elmydama rowaç bolsun!
Kakamyrat ÇARYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.