ÝAŞLARYŇ ARASYNDA ÝÜZE ÇYKÝAN JENAÝATYŇ ÖŇÜNI ALMAK BOÝUNÇA DUŞUŞYK GEÇIRILDI
2021-nji ýylyň 13-nji oktýabrynda BMG-niň Neşe we jenaýatçylyk baradaky müdirliginiň (UNODC) guramagynda ýaşlaryň arasynda jenaýatyň öňüni almak boýunça pikir alyşmak maksady bilen, Türkmenistanyň Bilim ministrliginiň, Türkmenistanyň Daşary işler ministrliginiň, Türkmenistanyň Daşary işler ministrliginiň Halkara gatnaşyklary institutynyň, Halkara ynsanperwer ylymlary we ösüş uniwersitetiniň, ýurdumyzyň orta mekdepleriniň mugallymlarynyň gatnaşmagynda “Jenaýatyň adyl kazyýetligi hem-de jenaýatyň we korrupsiýanyň öňüni almak” atly maksatnamasynyň çäklerinde wideo aragatnaşyk arkaly duşuşyk maslahaty geçirildi.
Duşuşygyň dowamynda halkara guramalaryň wekilleriniň, ýagny UNODC maksatnamasynyň dolandyryjysy jenap Kun Markwering hem-de “Merkezi Aziýada howpsuz migrasiýa” taslamasynyň ýolbaşçysy Hanym Eleanor Walentaýn dünýä tejribesine esaslanyp, ýaşlaryň arasynda jenaýatyň öňüni almak boýunça çykyş etdiler hem-de şeýle okuw sapaklarynyň mugallymlaryň arasynda yzygiderli dowam etdirilmekligi meýilleşdirilendigi barada hem bellenildi.
Bu duşuşyk maslahatyna Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş kafedrasynyň mugallymlary gatnaşdylar. Şu aýdylanlardan ugur alyp, bu maksatnamanyň çäklerinde geljekde ýerine ýetirilmeli işler dogrusynda hem durlup geçildi.
Dürli BALLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme
hukuk
öwreniş kafedrasynyň mugallymy.