Ýaşlar — Watanyň şamçyragy
Mälim bolşy ýaly, 2023-nji ýylyň 27-nji dekabrynda paýtagtymyzdaky Söwda-senagat edarasynda «Arkadag Serdarly bagtyýar ýaşlar ýyly» şygary astynda tamamlanyp barýan ýylyň jemlerini jemleýän özboluşly çäre — halkara ylmy-amaly maslahatyň we köpugurly serginiň açylyş dabarasy geçirildi. Bu dabaralaryň dowamynda üstümizdäki ýyl boýunça ykdysadyýetimiziň dürli ulgamlarynda mynasyp görkezijileri görkezen ýaşlara döwlet sylaglary gowşuryldy.
Tamamlanyp barýan ýylda ýurdumyzyň hoşniýetli daşary syýasatyny halkara giňişlikde ýaýbaňlandyrmakda hem-de durmuşa geçirmekde, ony işjeň wagyz etmekde diplomatik gullugyň ýaş işgärleri hem aýratyn görelde görkezdiler. Şunuň bilen baglylykda, 2023-nji ýylyň 28-nji dekabrynda Türkmenistanyň Daşary işler ministrliginiň Halkara gatnaşyklary institutynda degişli ulgamyň ýaşlaryny gazanan üstünlikleri bilen gutlap, olary sylaglamak dabarasy geçirildi. Bu dabara Türkmenistanyň Ministrler Kabinetiniň Başlygynyň orunbasary, Türkmenistanyň Daşary işler ministri R.Meredow, Türkmenistanyň Daşary işler ministrliginiň wekilleri, türkmen diplomatiýasynyň milli mekdebiniň mugallymlary hem-de talyp ýaşlary gatnaşdylar. Dabaranyň dowamynda ýaşlara degişli ulgamyň Hormat hatlary hem-de ýadygärlik sowgatlary gowşuryldy. Bellenilişi ýaly, häzirki döwürde ýaş nesiller bilimlerini we zehinlerini dürli ders olimpiadalarynda, döredijilik bäsleşiklerinde, sungat festiwallarynda, sport ýaryşlarynda görkezýärler, döwlet hem-de hususy düzümlerde üstünlikli zähmet çekip, milli ykdysadyýetimiziň ähli pudaklarynyň okgunly ösdürilmegine işjeň gatnaşýarlar.
Garaşsyzlyk ýyllarynda durmuşa geçirilen düýpli özgertmeler ýurdumyzyň keşbini tanalmaz derejede özgertdi. Gazanylan ägirt uly üstünlikler döwlet ösüş ugrunyň oýlanyşykly saýlanyp alnandygynyň görkezijisi bolmak bilen, bu ugry eziz Diýarymyzyň ykbaly we geljegi üçin jogapkärçilik çekýändiklerine düşünýän ähli türkmenistanlylaryň giňden goldaýandygynyň beýany boldy.
Belent ruhly, hemmetaraplaýyn bilimli, aň we beden taýdan kämil, watansöýüji ýaş nesli terbiýeläp ýetişdirmek Berkarar döwletiň täze eýýamynyň Galkynyşy döwründe döwlet syýasatynyň strategik wezipeleriniň biri hökmünde kesgitlenildi. 2022-nji ýylyň 19-njy martynda hormatly Prezidentimiz Serdar Berdimuhamedow iň ýokary döwlet wezipesine girişmek dabarasynda maksada okgunly, ýokary hünärli, taýýarlykly, giň gözýetimli, innowasion tehnologiýalary dolandyrmaga ukyply ýaşlary terbiýelemegi ilkinji nobatdaky wezipeleriň hatarynda belledi. Bu ugurda alnyp barylýan işleriň hukuk binýadyny pugtalandyrmak maksady bilen, binýatlaýyn resminama — «Ýaşlar barada döwlet syýasaty hakynda» Türkmenistanyň Kanunynyň rejelenen görnüşi işlenip taýýarlanyldy we kabul edildi. «Türkmenistanda ýaşlar baradaky döwlet syýasatynyň 2021 — 2025-nji ýyllar üçin Döwlet maksatnamasy» we ony durmuşa geçirmek boýunça çäreleriň meýilnamasy tassyklanyldy.
Täze ýylyň öňüsyrasynda döwlet Baştutanymyzyň türkmen ýaşlarynyň ýaşaýyş-durmuşyna, ähli ugurlarda gazanan üstünliklerine bagyşlap ýazan «Ýaşlar — Watanyň daýanjy» atly kitaby ähli türkmenistanlylar üçin ajaýyp sowgat boldy. Türkmenistanyň Daşary işler ministrliginiň Halkara gatnaşyklary institutynda geçirilen dabaranyň dowamynda oňa gatnaşyjylar türkmen ýaşlaryny ähli ugurlarda goldaýan Gahryman Arkadagymyza, Arkadagly Gahryman Serdarymyza alkyş sözlerini aýtdylar.
Oguloraz EÝEBERDIÝEWA,
Türkmenistanyň Daşary işler ministrliginiň
Halkara gatnaşyklary institutynyň uly mugallymy.