ÝAŞLAR ÜÇIN OKUW SAPAGY GEÇIRILDI
2025-nji ýylyň 24-25-nji sentýabrynda Ýewropada Howpsuzlyk we Hyzmatdaşlyk Guramasynyň wekilleri tarapyndan onuň Aşgabatdaky Merkeziniň binasynda “Zorlukly ekstremizmiň we terrorçylyga alyp barýan radikalizmiň öňüni almak babatynda metbugat we maglumat sowatlylygy” atly ýaşlar üçin okuw sapagy geçirildi. Bu okuw sapagynyň geçirilmeginiň esasy maksady zorlukly ekstremizmiň we terrorçylyga alyp barýan radikalizmiň öňüni almak babatynda ýaşlaryň habarlylygyny artdyrmak bolup durýar.
Okuw sapagyna Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Türkmenistanyň Daşary işler ministrliginiň Halkara gatnaşyklary institutynyň talyplary hem-de Magtymguly adyndaky Ýaşlar guramasynyň, Gyzyl ýarymaý milli jemgyýetiniň wekilleri gatnaşdylar.
Okuw sapagynyň dowamynda habar beriş serişdelerinde bolup geçen wakalar beýan edilende “zyýan berme” ýörelgesine düşünmek, maglumat sowatlylygy boýunça hyzmatdaşlyk, ekstremizme garşy durnukly maglumat howpsuzlygyny üpjün etmek ýaly meselelere giňişleýin seredildi. Okuw sapagy sowal-jogap esasynda alnyp baryldy we onuň ahyrynda oňa gatnaşan ýaşlara sertifikatlar gowşuryldy.
Abraýhan IKRAMOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.