“ÝAŞLAR HALKARA HUKUGYNY BERKITMEGIŇ UGRUNDA” ATLY GEÇIRILEN DIALOG
2026-njy ýylyň 24-nji aprelinde Türkmenistanyň Daşary işler ministrliginiň Halkara gatnaşyklary instituty hem-de Türkmenistanyň Magtymguly adyndaky Ýaşlar guramasynyň Merkezi Geňeşi bilen bilelikde ýurdumyzyň ýokary okuw mekdepleriniň talyplarynyň arasynda “Ýaşlar halkara hukugyny berkitmegiň ugrunda” atly ýaşlar dialog meýdançasy geçirildi.
Bu dialoga Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň Türkmenistanyň Içeri işler ministrliginiň institutynyň hem-de Türkmenistanyň Daşary işler ministrliginiň Halkara gatnaşyklary institutynyň hukuk hünäri boýunça bilim alýan talyplary gatnaşdylar.
Bu dialogyň geçirilmegi BMG-niň Baş Assambleýasynda Türkmenistanyň başlangyjy bilen wajyp halkara meseleleriň çözgüdine gönükdirilen köpsanly Rezolýusiýalaryň kabul edilmegi, şeýle-de abadançylygyň we durnukly ösüşiň esasy bolan Bitaraplyk syýasatynyň dabaralanmasy hökmünde 2028-nji ýylyň “Halkara hukugyň ýyly” diýlip yglan edilmegi hem-de dünýä döwletleriniň arasyndaky gatnaşyklaryň halkara hukugynyň umumy ykrar edilen kadalary esasynda alnyp barylmalydygyny aýdyň şöhlelendirýär. Bu geçirilen dialog Hormatly Prezidentimiziň 2028-nji ýylyň “Halkara hukugyň ýyly” diýip yglan etmek baradaky başlangyçlaryny, onuň manysyny we mazmunyny ýaşlaryň arasynda giňden düşündirmek, şeýle hem halkara hukugy barada hünärmenleriň bilimlerini ýokarlandyrmak maksady bilen geçirildi. Dialogyň dowamynda oňa gatnaşyjylar Hormatly Prezidentimiziň BMG-de öňe süren halkara başlangyçlaryny durmuşa geçirmek barada teklipleri bilen çykyş etdiler.
Dialogyň ahyrynda oňa gatnaşyjylara Türkmenistanyň Magtymguly adyndaky Ýaşlar guramasynyň Merkezi Geňeşiniň adyndan Hormat hatlary we ýadygärlik sowgatlary dabaraly ýagdaýda gowşuryldy.
Dürli BALLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk
öwreniş kafedrasynyň uly mugallymy.