ÝAŞLAR BARADAKY ALADA DÖWLETIMIZIŇ ESASY WEZIPESIDIR
Berkarar döwletiň täze eýýamynyň Galkynyşy döwründe eziz Diýarymyzyň bagtyýar geljegini ýaş nesiller bilen baglanyşdyrýan hormatly Prezidentimiziň başda durmagynda ýaşlaryň döwrebap bilim almagy, olaryň ýurdumyza gerekli hünärmenler bolup ýetişmekleri, ylym-bilime höweslenmekleri ugrunda ähli mümkinçilikler döredilýär. Ýaş nesiller, olaryň sazlaşykly ösüşi we saglygy, mynasyp bilim-terbiýe almaklary, saýlap alan hünärine eýe bolmaklary, ylym we döredijilik, bedenterbiýe, sport bilen meşgullanmaklary üçin zerur şertleriň döredilmegi baradaky alada Türkmenistanyň döwlet syýasatynyň ileri tutulýan ugurlarynyň birine öwrüldi. «Halkyň Arkadagly zamanasy» şygary astynda geçýän ýylda ýurdumyzda hormatly Prezidentimiziň baştutanlygynda döwletimiziň we jemgyýetimiziň ähli ugurlaryny öz içine alýan giň möçberli özgertmeler maksatnamalary yzygiderli durmuşa geçirilýär.
2022-nji ýylyň 14-nji sentýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Baş prokuraturasynyň, Türkmenistanyň Ýokary kazyýetiniň, Türkmenistanyň Içeri işler ministrliginiň, Türkmenistanyň Magtymguly adyndaky Ýaşlar guramasynyň Aşgabat şäheriniň Berkararlyk etrap geňeşiniň, Talyplar Saglyk öýüniň wekilleriniň, institutyň mugallymlarynyň we talyp ýaşlarynyň gatnaşmagynda wagyz-nesihat çäresi geçirildi. Bu wagyz-nesihat çäresi «Halkyň Arkadagly zamanasy» ýylynda ýaşlaryň arasynda terbiýeçilik işlerini güýçlendirmek, olaryň ýüze çykýan nogsanlyklardan daşda durmaklaryny gazanmak, hukuk bilimlerini artdyrmak, zyýanly endikleriň adamyň saglygyna ýetirýän zyýany baradaky sowatlygyny ýokarlandyrmak, hukuk bozulmalary duýdurmaga, jenaýatçylygyň öňüni almaga, milli däp-dessurlary, şeýle hem her ýylyň sentýabr aýynda ýurdumyzyň ähli ýerlerinde «Ýol hereketiniň howpsuzlygy – ömrümiziň rahatlygy» atly şygar bilen geçirilýän bir aýlygyň ähmiýeti we ondan gelip çykýan esasy wezipeleri hem-de ýol hereketiniň howpsuzlygynyň wajyplygy barada giňden wagyz-nesihat etmek maksady bilen geçirildi.
Wagyz-nesihat çäresinde çykyş edenler Watanymyzyň mundan beýläk-de sazlaşykly ösüşine, halkara derejedäki abraýynyň ýokarlanmagyna goşant goşmaga gyzyklanmasy ýokary bolan ýaşlaryň işjeň we jogapkärçilikli durmuş ýörelgesi olaryň özleri üçin döwlet tarapyndan edilýän aladalara mynasyp jogaby bolup durýandygy barada bellediler.
Merjen GURBANNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk
öwreniş
kafedrasynyň uly mugallymy
Şeýle hem bu barada şu ýerden okap bilersiňiz!