Ýaş žurnalistler bäsleşdiler
2021-nji ýylyň 11-nji oktýabrynda Türkmenistanyň Daşary işler ministrliginiň Halkara gatnaşyklary institutynyň talyplary tarapyndan taýýarlanan wideorolikleriň bäsleşigi geçirildi. Oňa Halkara žurnalistikasy fakultetiniň Halkara žurnalistikasy hünäriniň 1-nji, 2-nji we 3-nji ýyl, şeýle-de Syýasy kommunikasiýa we internet žurnalistikasy boýunça taýýarlygyň bakalawr ugrunyň 1-nji ýyl talyplary öz wideorolikleri bilen gatnaşdylar.
Bäsleşigi jemlemäge gatnaşan emin agzalary wideoroliklerde ýurdumyzyň Hazar deňziniň we onuň portlarynyň mümkinçiliklerini netijeli peýdalanmakda gazanýan üstünlikleriniň giň şöhlelenme tapandyklaryny bellediler. Olaryň nygtap aýtmaklaryna görä, Türkmenbaşy şäherinde gurlup ulanylmaga berlen Halkara deňiz portunyň mümkinçilikleri, Hazarýaka döwletleriniň ykdysady we ulag-logistiki ulgamda hyzmatdaşlygyny işjeňleşdirmekde ýurdumyz tarapyndan amala aşyrylýan işler, bu ugurda geçirilen Hazar sammitleriniň ähmiýeti, Hazar deňziniň ekologik arassalygyny goramak ugrunda edilýän tagallalar täsirli beýan edilipdir.
Bäsleşigiň emin agzalary tarapyndan Halkara žurnalistikasy fakultetiniň Halkara žurnalistikasy hünäriniň 1-nji ýyl talyplarynyň taýýarlan wideoroligine birinji orun berildi. Ikinji ýere şol fakultetiň Halkara žurnalistikasy hünäriniň 2-nji ýyl talyplarynyň, üçünji ýere bolsa Halkara žurnalistikasy hünäriniň 3-nji ýyl talyplarynyň hem-de Syýasy kommunikasiýa we internet žurnalistikasy boýunça taýýarlygyň bakalawr ugrunyň 1-nji ýyl talyplarynyň taýýarlan wideorolikleri mynasyp boldy. Bäsleşigiň ýeňijilerine gymmat bahaly sowgatlar gowşuryldy.
Bäsleşigiň ahyrynda oňa gatnaşanlaryň bellemegine görä, şeýle bäsleşikleriň yzygiderli geçirilip durulmagy žurnalistika ugrundan ýokary bilim alýan talyp ýaşlaryň öz saýlap alan kärlerine bolan söýgüsini artdyrýar, olary täze gözleglere ruhlandyrýar.
Batyrmuhammet ORAZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.