ÝAŞ HABARÇYLARA TESWIRLEÝJINIŇ USSATLYGY BARADA OKUW SAPAGY GEÇIRILDI
2026-njy ýylyň 27-nji ýanwarynda Halkara ýaýlyma beriş merkezinde Türkmenistanyň Telewideniýe, radiogepleşikler we kinematografiýa baradaky döwlet komitetiniň guramagynda şu ýylyň 11-nji fewralynda Aşgabat şäherinde geçirilýän Türkmenistanyň «Arkadag» futbol kluby bilen Saud Arabystanyň «Al-Nasr» toparynyň arasynda AFC-2 Çempionlar ligasynyň 1/8 finalynyň ilkinji duşuşygyny şöhlelendirmek maksady bilen ýurdumyzyň ýokary okuw mekdeplerinden gatnaşjak ýörite habarçylar (media) toparynyň ýaş wagyzçylary bilen okuw sapagy geçirildi. Oňa habarçylar (media) toparynyň agzalary gatnaşdylar.
Okuw sapagyny «Teswirleýjiniň ussatlygy» atly tema boýunça «Türkmenistan: Sport» teleýaýlymynyň öňdebaryjy teswirleýjisi Ýunus Annaýew alyp bardy. Ussat halypa öz çykyşynda ýurdumyzda geçirilýän sport ýaryşlaryny mynasyp şöhlelendirmek üçin sport žurnalistiniň maglumat gorunyň baý bolmalydygyny belläp, ýaýlyma goýberilýän gepleşiklerde teswir bermegiň aýratynlyklary barada aýtdy. Şeýle-de tejribeli teswirleýji ýaşlara teswir bermegiň tehnikasyny, sport oýunlaryny teswirlemegiň inçe syrlaryny öwretdi. Sport žurnalistleri hökmünde döredilen mümkinçiliklerden peýdalanyp, talyplaryň hünärini kämilleşdirmekleri barada aýratyn nygtap, sportuň howandary Gahryman Arkadagymyza, hormatly Prezidentimize alkyş sözlerini aýtdy.
Jemile PÜRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti
kafedrasynyň uly mugallymy.