Ýaş diplomatlar üçin Ilçileriň umumy sapaklary tamamlandy
Berkarar döwletiň bagtyýarlyk döwründe Garaşsyz, Bitarap Türkmenistan hemmetaraplaýyn kämilleşýär we özgerýär. Biziň ýurdumyz dünýä jemgyýetçiligi bilen bilelikde 2021-nji ýyly “Halkara parahatçylyk we ynanyşmak ýyly” diýen şygar astynda geçirýär, bu bolsa biziň Watanymyzyň bitaraplygynyň halkara hukuk derejesine eýe bolmagynyň 25 ýyllygyna bagyşlanan möhüm taryhy wakalarynyň dowamydyr.
Türkmenistanyň hormatly Prezidenti Gurbanguly Berdimuhamedow diplomatik işgärlere ýüzlenip, olaryň öňünde, kabul edýän ýurduň halkyny watanymyzyň durmuşy, daşary we içeri syýasatlarynyň maksatlary we aýratynlyklary barada ygtybarly we dogry maglumatlar bilen habarly etmek üçin örän möhüm wezipeleri goýýar. Türkmenistanyň prezidenti ýurduň diplomatik gullugynyň işgärlerinden resmi borçlaryny ýokary hilli we netijeli ýerine ýetirmegi talap edýär.
Şu nukdaýnazardan, geljekki diplomatlary taýýarlamak işine tejribeli diplomatlary, ilçileri çekmek möhümdir. Çünki, olaryň bu ugurdaky toplan tejribesi örän gymmatlydyr. Üstümizdäki ýylyň 31-nji maýy we 23-nji iýuny aralygynda ýaş diplomatlar üçin guralan Türkmenistanyň daşary ýurtlardaky ilçileriniň wideoaragatnaşyk arkaly okuw sapaklary ýokardaky aýdylanlara doly şaýatlyk edýär.
Çykyşlarda Türkmenistanyň daşary syýasat ugrunyň üstünlikleriniň esasy özenini düzýän global we sebitleýin ösüşiň täze we jogapkärli wezipeleri beýan edildi. Çünki, Türkmenistanyň prezidenti Gurbanguly Berdimuhamedowyň (2017-nji ýylyň 18-nji fewraly) karary bilen tassyklanan 2017 - 2023-nji ýyllar aralygyndaky Türkmenistanyň daşary syýasat konsepsiýasy ýurduň diplomatik gullugynyň öňünde anyk talaplary kesgitledi.
Şu maksatlardan ugur alyp, Daşary işler ministrliginiň tagallasy bilen, türkmen diplomatiýasynyň ýokary mekdebiniň talyplarynyň bilim gorlaryny artdyrmak üçin daşary ýurtlarda akkreditlenen türkmen ilçileriniň umumy sapaklary guraldy. Bu geçilen umumy sapaklaryň her biri we olaryň aýratynlyklary barada ozal bütewi bilim portalynda we web sahypalarynda habar berlipdi. Şeýlelikde, çykyşlaryň hemmesini jemläp, olaryň ählisiniň Türkmenistanyň dünýä döwletleri we halkara guramalary bilen ikitaraplaýyn we köptaraplaýyn hyzmatdaşlygynyň, şol sanda halkara gatnaşyklarynyň möhüm meselelerine bagyşlanandygyny aýdyp bileris.
Merdan BERDINYÝAZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara
gatnaşyklary we diplomatiýa
kafedrasynyň
mugallymy,
institutyň halkara hyzmatdaşlyk
boýunça jogapkär hünärmeni