Ýaş çaparlaryň buýsanja beslenen duşuşygy
2022-nji ýylyň 8-nji sentýabrynda Türkmenistanyň Daşary işler ministrliginiň Halkara gatnaşyklary institutynda ýaş çaparlaryň gatnaşmagynda ýörite gepleşik ýazgy edildi. Bu gepleşikde Türkmenistanyň Daşary işler ministrliginiň Halkara gatnaşyklary institutynyň garamagyndaky Ýaş diplomatlaryň mekdebi tarapyndan mekdep okuwçylarynyň arasynda geçirilýän «Parahatçylygyň ýaş çaparlary» atly akyl-paýhas bäsleşiginiň 1-nji möwsüminiň ýeňijileri — türkmen diplomatiýasynyň milli mekdebiniň I ýyl talyplary bu akyl-paýhas bäsleşigi dogrusyndaky özleriniň ýürek buýsançlaryny beýan etdiler.
Bagtyýar talyp ýaşlar gepleşigiň barşynda «Parahatçylygyň ýaş çaparlary» atly akyl-paýhas bäsleşiginiň 1-nji möwsüminiň dowamynda başdan geçiren gyzgalaňly oýun pursatlaryny, ýakymly ýatlamalaryny paýlaşdylar. Ýaş çaparlar aýratyn hem, bäsleşigiň dowamynda türkmen diplomatiýasynyň gadymy köklerini, Gahryman Arkadagymyzyň jöwher paýhasyndan syzylyp çykan eserlerindäki gymmatly taryhy maglumatlary öwrenendiklerini belläp geçdiler. Şeýle-de, olar «Parahatçylygyň ýaş çaparlary» atly akyl-paýhas bäsleşiginiň 2-nji möwsümine gatnaşjak mekdep okuwçylaryna üstünlik arzuw etdiler. Gepleşigiň ahyrynda bäsleşigiň 1-nji möwsüminiň ýeňijileri — Türkmenistanyň Daşary işler ministrliginiň Halkara gatnaşyklary institutynyň I ýyl talyplary ýurdumyzda ýaşlaryň kämil bilimli bolup ýetişmekleri, olaryň ukyp-başarnyklaryny açyp görkezmekleri üçin uly mümkinçilikleri döredip berýän Arkadagly Serdarymyza köp sagbolsun aýdyp, hormatly Prezidentimiziň janynyň sag, belent başynyň aman, tutýan tutumly işleriniň hemişe rowaç bolmagyny arzuw etdiler.
Gurbansähet GURBANSÄHEDOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň talyby.
Şeýle hem bu barada şu ýerden okap bilersiňiz!