Ýaragsyzlanmak meselesi boýunça halkara maslahat
2021-nji ýylyň 27-nji aprelinde BMG-nyň Merkezi Aziýa üçin Öňüni alyş diplomatiýasynyň sebit merkezinde (UNRCCA) "Parahatçylygy, durnuklylygy we howpsuzlygy üpjün etmek: ýaragsyzlanmak ulgamynda halkara we sebit hyzmatdaşlygyny berkitmek" atly halkara maslahaty geçirildi.
Maslahat iki bölümden, ýagny ýokary derejeli umumy mejlisden we ýaşlar mejlisinden ybarat boldy.
Umumy mejlise Türkmenistanyň Daşary işler ministri Raşid Meredow, ýaragsyzlanmak, parahatçylyk we howpsuzlyk babatynda halkara guramalarynyň ýokary derejeli wekilleri gatnaşdylar. Ýaşlar mejlisinde Türkmenistandan we daşary ýurtlardan işjeň ýaşlar, şol sanda Daşary işler ministrliginiň Halkara gatnaşyklar institutynyň we Halkara ynsanperwer ylymlary we ösüş uniwersitetiniň wekilleri gatnaşdylar.
Maslahatyň dowamynda ýaragsyzlanmak boýunça konstruktiw pikir alyşmalar geçirildi. Ýaragsyzlanmak temasynyň çäklerinde parahatçylyk medeniýetiniň ýaýramagy bilen bagly mesele hem ünsden düşürilmedi. Bu ugurda Türkmenistanyň Daşary işler ministrliginiň Halkara gatnaşyklary institutynyň talyby Diýar Lomanow işjeň gatnaşyp, ýurdumyzyň DÖM-iň ýaş ilçileriniň adyndan çykyş etdi. Gatnaşyjylaryň çykyşlarynyň, teklipleriniň we pikirleriniň ählisi diňlenileninden soň, maslahaty alyp baryjy maslahaty jemläp, gatnaşanlaryň ählisine minnetdarlyk sözlerini beýan etdi.
Maksat MUHAMMEDOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň III ýyl talyby