Wagyz-nesihat duşuşygy geçirildi
2023-nji ýylyň 15-nji fewralynda Türkmenistanyň Daşary işler ministrliginiň Halkara gatnaşyklary institutynda wagyz-nesihat duşuşygy geçirildi. Oňa Türkmenistanyň Daşary işler ministrliginiň Halkara gatnaşyklary institutynyň talyp ýaşlary we professor-mugallymlary, şeýle-de birnäçe ýokary derejeli myhmanlar gatnaşdylar. Duşuşygy Türkmenistanyň Daşary işler ministrliginiň Halkara gatnaşyklary institutynyň Magtymguly adyndaky ilkinji Ýaşlar guramasynyň başlygy Ismail Ýakubow alyp bardy.
Duşuşykda Aşgabat şäheriniň 7-nji saglyk öýüniň maşgala lukmany Enejan Bugraýewa, Aşgabat şäheriniň 51-nji orta mekdebiniň mugallymy, Türkmenistanyň Zenanlar bileleşiginiň merkezi geňeşiniň işjeň agzasy Ogulnabat Owlakowa, Türkmenistanyň Magtymguly adyndaky Ýaşlar guramasynyň Aşgabat şäher geňeşiniň köpçülikleýin habar beriş bölüminiň müdiri Amanberdi Annaberdiýew çykyş edip, Bitarap Türkmenistanyň daşary syýasy ugrunyň 2022-2028-nji ýyllar üçin konsepsiýasyny durmuşa geçirmek maksady bilen biologiki howpsuzlyk we lukmançylyk diplomatiýasynyň ösdürilişi, hormatly Prezidentimiziň sagdyn durmuş ýörelgesini durmuşa has-da içgin ornaşdyrmak, talyp oglan-gyzlaryň arasynda neşe serişdeleri bilen bagly işlere baş goşmazlyk, humarly oýunlardan daşda durmak, tertip-düzgüni has-da berkitmek ugrunda alnyp barylýan işler barada gürrüň berdiler.
Duşuşygyň ahyrynda talyplaryň we myhmanlaryň arasynda gyzyklandyrýan meseleler boýunça sorag-jogaplar alşyldy.
Aýnur ŽANAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň II ýyl talyby.