Wagyz-nesihat duşuşygy geçirildi
2022-nji ýylyň 3-nji noýabrynda Türkmenistanyň Daşary işler ministrliginiň Halkara gatnaşyklary institutynda institutyň professor-mugallymlary we talyp ýaşlarynyň gatnaşmagynda wagyz-nesihat duşuşygy geçirildi. Bu duşuşygy institutyň okuw işleri boýunça prorektory Gülşat Ýusupowa alyp bardy. Oňa Türkmenistanyň Baş prokuraturasynyň uly prokurory Allamyrat Amandurdyýew, Türkmenistanyň Milli Geňeşiniň Halk Maslahatynyň agzasy Ýazmämmet Ataýew, Türkmenistanyň Milli Geňeşiniň Mejlisiniň deputaty Serdar Durdyýew hem-de Türkmenistanyň Magtymguly adyndaky Ýaşlar guramasynyň Merkezi Geňeşiniň başlygynyň orunbasary Döwletgeldi Durdymuhammedow gatnaşyp, jenaýatçylykly hereketleriň öňüni almakda we ýaşlary dogry ýola gönükdirmekde milli ahlak ýörelgelerinden ugur alynmalydygy barada baý mazmunly çykyş etdiler.
Maslahatda ýaşlarda milli mirasymyza bolan sarpany kemala getirmek, sagdyn durmuş ýörelgesine eýermek, zyýanly endiklerden daşda durmak barada durmuşdan alnan mysallar arkaly çykyşlar edildi. Şeýle-de, olarda ata-babalarymyzyň müňýyllyklaryň dowamynda kemala getiren mertlik, edermenlik, watansöýüjilik, halallyk ýaly häsiýetlerini terbiýelemegiň hem-de milli gymmatlyklarymyza bolan sarpany oýarmagyň möhümdigi aýratyn bellenilip geçildi.
Resul GYLYJOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň II ýyl talyby.