UGANDA RESPUBLIKASYNYŇ WEKILLERI BILEN GEÇIRILEN OKUW SAPAGY
2026-njy ýylyň 25-nji martynda Türkmenistanyň Daşary işler ministrliginiň Halkara gatnaşyklary institutynda Uganda Respublikasynyň Daşary işler ministrliginiň Halkara gatnaşyklary boýunça döwlet ministri Genri Orýem Okellonyň gatnaşmagynda okuw sapagy geçirildi. Oňa institutyň professor-mugallymlary we talyp ýaşlary gatnaşdylar.
Okuw sapagynyň başynda hormatly myhman Uganda Respublikasy bilen Türkmenistanyň arasyndaky hyzmatdaşlyk meselelerine ünsi çekdi. Diplomat öz çykyşynda häzirki zaman dünýäsinde diplomatiýanyň tutýan ornunyň örän uludygyny belläp geçdi. Ol talyplara Uganda Respublikasynyň daşary syýasatynyň ileri tutulýan ugurlary barada giňişleýin maglumat berdi. Hususan-da, Afrika yklymyndaky parahatçylygy we durnuklylygy saklamakda Uganda Respublikasynyň alyp barýan işlerini we halkara guramalarynyň çäklerindäki hyzmatdaşlygy barada durup geçdi. Şeýle-de ol çykyşynyň dowamynda Türkmenistanyň baky Bitaraplyk hukuk ýagdaýyna ýokary baha berdi.
Onuň bellemegine görä, Türkmenistanyň baky Bitaraplygy diňe bir sebit däl, eýsem dünýä derejesinde parahatçylygyň we ynanyşmagyň nusgasydyr. Ol geljekki diplomatlara ýüzlenip, Bitaraplyk syýasatynyň halkara jedellerini parahatçylykly ýol bilen çözmekde iň täsirli usuldygyny nygtady.
Onuň bellemegine görä, diplomatlar üçin mahsus bolan iň wajyp häsiýetler hökmünde islendik gepleşiklerde sabyrlylygyň hem-de agraslygyň zerurdygyny, daşary ýurt dillerini bilmek we dürli medeniýetlere hormat goýmak arkaly giň gözýetimli bolmagyň wajypdygyny, şeýle hem öz döwletiniň bähbitlerini hemişe birinji orunda goýýan belent watançylyk duýgusynyň bolmalydygyny talyplaryň dykgatyna ýetirdi.
Okuw sapagynyň ahyrynda talyplar bilen sorag-jogap alşyldy, onda talyplar özlerini gyzyklandyrýan halkara meseleleri barada sowallar berdiler we hormatly myhman olara anyk jogaplary berip, ýaş diplomatlara geljekki hünärlerinde üstünlikleri arzuw etdi. Okuw sapagy tamamlanandan soň institut boýunça tanyşlyk geçirildi. Myhmanlar türkmen diplomatiýasynyň taryhy muzeýi bilen tanyşdyryldy. Gezelenç hormatly myhmanlarda ýakymly täsir galdyrdy. Bu çäre iki ýurduň arasyndaky dostlukly gatnaşyklary berkitmekde we diplomatik tejribe alyşmakda möhüm ädim boldy.
Şyhdurdy ŞYHYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby.