Türkmenistanyñ Ýokary kazyýeti tarapyndan geçirilen umumy okuw sapagy
2023-nji ýylyň 15-nji noýabrynda Türkmenistanyň Daşary işler ministrliginiň Halkara gatnaşyklary institutynyň Halkara hukugy fakultetinde okaýan talyplara Türkmenistanyň Ýokary kazyýetiniň Kazyýetleriň işini guramak boýunça müdirliginiň Kazyýetleriň iş tejribesini umumylaşdyrmak we kazyýet statistikasy bölüminiň müdiri Bäşim Ataýew Türkmenistanda kazyýet gurluşy we prokuror gözegçiligi dersi boýunça umumy okuw sapagyny geçdi.
Türkmen halkynyň geçmiş taryhynda milli demokratiýanyň we hukuk ýörelgeleriniň kökleri uzak asyrlardan gözbaş alyp gaýdýar. Halkymyzyň jemgyýetçilik durmuşynda ähli döwürlerde hem kazylaryň işine aýratyn ähmiýet berlipdir. Adyl kazyýetlik instituty geçmiş taryhymyzda dürli görnüşlerde hereket edipdir.
Umumy sapagyň dowamynda Türkmenistanyň Ýokary kazyýetiniň wekili ýurdumyzyň kazyýet edaralarynyň adyl kazyýetligi amala aşyrmak bilen, raýatlaryň hukuklaryny we azatlyklaryny, kanun tarapyndan goralýan döwlet we jemgyýetçilik bähbitlerini goramaklygy amala aşyrýandygy hakynda, şeýle hem kazyýetiň ähli işiniň kanunylygy, adalatlylygy we hukuk tertibini üpjün etmäge, hukuk düzgüniniň bozulmalaryna eltýän sebäpleriň we şertleriň aradan aýrylmagyna gönükdirilýänligi barasynda giňişleýin gürrüň berdi.
Sapagyň ahyrynda talyplar bilen Türkmenistanyň Ýokary kazyýetiniň wekiliniň arasynda sorag-jogap alşyldy.
Nursähet JOMARTOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.