Türkmenistanyň Konstitusiýasynyň 30 ýyllygyna bagyşlanan nobatdaky duşuşyk
Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş kafedrasy her ýylyň 18-nji maýynda ýurdumyzda dabara bilen bellenilýän Türkmenistanyň Konstitusiýasynyň we Türkmenistanyň Döwlet baýdagynyň gününe bagyşlanan yzygiderli çäreleri geçirmekligi dowam edýär.
2022-nji ýylyň 29-njy aprelinde Türkmenistanyň Daşary işler ministrliginiň Halkara gatnaşyklary institutynda Türkmenistanyň Konstitusiýasynyň kabul edilmeginiň 30 ýyllygy mynasybetli «Türkmenistanyň Konstitusiýasyna 30 ýyl: Täze taryhy eýýamyň röwşen geljegine tarap» atly nobatdaky söhbetdeşlik duşuşygy geçirildi. Bu duşuşyk Halkara hukugy we deňeşdirme hukuk öwreniş kafedrasynyň «Ýaş hukukçylar» ylmy gurnagynyň guramagynda ýurdumyzyň belli halypa hukukçysy, Türkmenistanyň Prezidentiniň ýanyndaky Döwlet gullugy akademiýasynyň Raýat hukugy kafedrasynyň müdiri Ilmät Hanmedowyň gatnaşmagynda geçirildi.
Öz hünäriniň eýesi bolan halypa hukukçy talyp ýaşlara ýurdumyzyň Esasy Kanunynyň 30 ýylyň dowamynda kämilleşdirilişiniň esaslary, şeýle hem Türkmenistanyň Prezidentiniň ýanyndaky Döwlet gullugy akademiýasynyň döreýşi we alyp barýan işleri barada hem giňişleýin gürrüň berdi. Duşuşygyň dowamynda «Ýaş hukukçylar» ylmy gurnagynyň agzalary halypa mugallyma Halkara hukugy we Türkmenistanyň Konstitusiýasy barada gyzyklanýan soraglaryny berip, olar hakynda giňişleýin maglumat aldylar.
Merjen GURBANNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk
öwreniş
kafedrasynyň uly mugallymy.