Türkmenistanyň Konstitusiýasynyň 30 ýyllygyna bagyşlanan duşuşyk
Hemmämiziň bilşimiz ýaly, Türkmenistanyň Konstitusiýasynyň we Döwlet baýdagynyň güni her ýylyň 18-nji maýynda dabaraly bellenilip geçilýär. 2022-nji ýylyň 22-nji aprelinde Türkmenistanyň Daşary işler ministrliginiň Halkara gatnaşyklary institutynda Türkmenistanyň Konstitusiýasynyň kabul edilmeginiň 30 ýyllygy mynasybetli “Türkmenistanyň Konstitusiýasyna 30 ýyl: Täze taryhy eýýamyň röwşen geljegine tarap” atly söhbetdeşlik duşuşygy geçirildi. Bu duşuşyk Halkara hukugy we deňeşdirme hukuk öwreniş kafedrasynyň “Ýaş hukukçylar” ylmy gurnagynyň guramagynda ýurdumyzyň belli halypa hukukçysy, Türkmenistanyň Kärdeşler arkalaşyklarynyň Milli merkeziniň kärdeşler arkalaşyklarynyň agzalarynyň durmuş-zähmet hukuklaryny goramak boýunça bölüminiň müdiri, hukuk ylymlarynyň doktory, professor, Türkmenistanyň Hormatly il ýaşulusy Myrat Haitowyň gatnaşmagynda geçirildi. Söhbetdeşligiň dowamynda halypa hukukçy hem-de talyplaryň arasynda birnäçe gyzykly sorag-jogap alşyldy.
Öz hünäriniň eýesi bolan halypa hukukçy talyp ýaşlara Esasy Kanunymyzyň kabul edilenine 30 ýyl bolmagynyň döwletimiziň ösmeginde möhüm ähmiýete eýedigi barada belläp geçdi. Geçirilen duşuşyk ýaş hukukçylar üçin gymmatly çeşme hökmünde hyzmat eder.
Oguljahan JOBBOROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň 1-nji ýyl talyby.