Türkmenistanyň hukuk goraýjy edaralarynyň işgärleriniň gatnaşmagynda aýdym-sazly wagyz-nesihat duşuşygy geçirildi
2023-nji ýylyň 29-njy noýabrynda Türkmenistanyň hemişelik Bitaraplygynyň 28 ýyllyk baýramy mynasybetli Türkmenistanyň hukuk goraýjy edaralarynyň işgärleriniň gatnaşmagynda Türkmenistanyň Daşary işler ministrliginiň Halkara gatnaşyklary institutynda aýdym-sazly wagyz-nesihat duşuşygy geçirildi.
Türkmenistanyň Adalat ministrliginiň, Türkmenistanyň Içeri işler ministrliginiň, Türkmenistanyň Köpetdag etrap kazyýetiniň, Türkmenistanyň Döwlet migrasiýa gullugynyň wekilleri, Türkmenistanyň Magtymguly adyndaky Ýaşlar guramasynyň wekilleri, şeýle hem institutymyzyň mugallymlary we talyplary gatnaşdylar.
Çykyş edenler ýaşlarda milli mirasymyza bolan sarpany kemala getirmek, sagdyn durmuş ýörelgesine eýermek, watansöýüjilik, edermenlik, arassa ahlaklylyk, halallyk, zähmetsöýerlik ýaly häsiýetleri terbiýelemek maksady bilen, durmuşdan alnan mysallara salgylandylar. Şeýle hem çykyşlarda Gahryman Arkadagymyzyň, hormatly Prezidentimiziň taýsyz tagallalary bilen häzirki zaman türkmen jemgyýetinde ylym-bilimli ýaş nesli kemala getirmek, olary milli ruhda terbiýelemek üçin alnyp barylýan işler barada hem aýratyn durup geçdiler.
Duşuşygyň institutymyzyň döredijilik topary tarapyndan taýýarlanan aýdym-sazly çykyşlar bilen utgaşmagy bu ajaýyp güne has-da täsirli öwüşgin çaýdy.
Duşuşygyň ahyrynda oňa gatnaşyjylar güneşli Diýarymyzy bagtyýar nesilleriň iň arzyly arzuwdyr islegleriniň hasyl bolýan mekanyna öwüren, jemgyýetçilik durmuşynyň ähli ugurlarynda kanunlaryň hökmürowanlygy, döwletiň kanun çykaryjy edarasy tarapyndan döwletiň adyndan kabul edilýän kanunlaryň adalatlylyk, ynsanperwerlik, halk häkimiýetliligi, deň hukuklylyk, ynsanyň tebigy hem mizemez hukuklarynyň eldegrilmesizligi ýaly umumy ykrar edilen hukuk ýörelgelerini üpjün edýän hormatly Prezidentimize, türkmen halkynyň Milli Lideri Gahryman Arkadagymyza çäksiz alkyş sözlerini aýtdylar.
Tawus NEPESOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.