Türkmenistanyň hormatly Prezidenti Gurbanguly Berdimuhamedowyň täze döreden “Jan Watanym Türkmenistan!” atly goşgusyna bagyşlanan maslahat
2022-nji ýylyň 5-nji ýanwarynda Türkmenistanyň Daşary işler ministrliginiň Halkara gatnaşyklary institutynda Türkmenistanyň hormatly Prezidenti Gurbanguly Berdimuhamedowyň täze döreden “Jan Watanym Türkmenistan!” atly goşgusyna bagyşlanan maslahat geçirildi. Maslahatda Türkmenistanyň Ministrler Kabinetiniň Başlygynyň Orunbasary, Daşary işler ministri Raşid Meredow, Birleşen Milletler Guramasynyň Bilim, ylym we medeniýet boýunça guramasynyň (UNESCO) işleri barada Türkmenistanyň milli toparynyň jogapkär sekretary Çynar Rüstemowa, Türkmenistanyň Daşary işler ministrliginiň Halkara gatnaşyklary institutynyň rektory Jumamyrat Gurbangeldiýew, Türkmenistanyň Döwlet, hukuk we demokratiýa institutynyň direktory Ýagmyr Nuryýew, şeýle hem institutyň professor-mugallymlary çykyş etdiler.
Maslahatda çykyş edenler esasanam “Halkyň Arkadagly zamanasy” atlandyrylan täze 2022-nji ýylynyň ilkinji pursatlarynda hormatly Prezidentimiziň halkymyza peşgeş beren “Jan Watanym Türkmenistan!” atly goşgusynyň watansöýüjilik ähmiýetini we Täze ýylyň üstünlikleriniň kepili hökmünde halkymyzy şatlandyrandygyny belläp geçdiler. Hormatly Prezidentimiziň halkymyza täze ýyl gutlagynda belläp geçen “Türkmenistan – parahatçylygyň we ynanyşmagyň Watany” ýylynda örän uly üstünlikleriň gazanylandygyny belläp, täze ýyla umyt-arzuwlar hem-de aýdyň we belent maksatlar bilen gadam basýandygymyzy nygtamagy halkymyzy milli Liderimiziň daşynda has-da jebisleşdirdi. Mähriban Arkadagymyzyň “Döwlet adam üçindir!” diýen syýasata esaslanyp, alyp barýan içeri syýasatynyň we bitaraplyk ýörelgämize daýanýan daşary syýasatymyzyň sazlaşmagynda milli ösüşlerimiziň halkara derejesinde nusgalyk ösüşlere öwrülýändigini, halkymyzyň durmuş, hal-ýagdaýyny barha ýokarlandyryp, berkararlyk binýadymyzy has-da berkidýändigini öňe sürdiler.
Gahryman Arkadagymyzyň ýurdumyzyň ösüşini diwersifikasiýa ýoly bilen alyp gidip, döwletimizi senagatlaşdyrmak, sanlylaşdyrmak, gülletmek netijesinde kämil jemgyýeti gurmak wezipesini düýpli çözmekde milli, medeni-ruhy aýratynlyklarymyza we döredijilige uly ähmiýet berýändigini nygtadylar.
Maslahata gatnaşyjylaryň adyndan hormatly Prezidentimize Ýüzlenme kabul edilip, onda “Jan Watanym Türkmenistan!” goşgusynyň watansöýüjiligiň nusgalyk çeşmesi hökmünde halkymyzy jebislikde geljekki üstünliklere ruhlandyrýandygyny aýratyn nygtaldy. Dabara gatnaşyjylar hormatly Prezidentimiziň galamynyň ýiti, döredijilik eserleriniň höwrüniň köp bolmagyny, janynyň sag, ömrüniň uzak, il-ýurt bähbitli, umumadamzat ähmiýetli işleriniň rowaç bolmagyny arzuw etdiler.
Batyr KAIROW,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallymy
Şeýle hem habar barada goşmaça aşakdaky saýtlarda okap bilersiňiz.