“TÜRKMENISTANYŇ HALK MASLAHATY: DEMOKRATIÝANYŇ ÝOKARY NUSGASY” ATLY MASLAHAT
2025-nji ýylyň 9-njy oktýabrynda Türkmenistanyň Daşary işler ministrliginiň Halkara gatnaşyklary institutynda şu ýylyň 19-njy sentýabrynda geçirilen Türkmenistanyň Halk Maslahatynyň ähmiýetini we netijelerini wagyz etmek maksady bilen “Türkmenistanyň Halk Maslahaty: demokratiýanyň ýokary nusgasy” atly maslahat geçirildi. Oňa institutyň professor-mugallymlary we talyplary işjeň gatnaşdylar.
Çäräniň dowamynda çykyş edenler ýurduň jemgyýetçilik-syýasy durmuşynda möhüm ähmiýete eýe bolan Türkmenistanyň Halk Maslahatynyň işleriniň ýokary guramaçylyk derejesinde geçirilmeginiň ähmiýeti barada durup geçdiler. Şeýle hem Türkmenistanyň Halk Maslahatynyň mejlisinde ýurdumyzyň oňyn Bitaraplyk syýasatynyň milli kanunçylykdaky ornuny has-da berkitmek maksady bilen strategik ähmiýete eýe bolan “Bitarap Türkmenistanyň parahatçylyk we ynanyşmak syýasatynyň hukuk esaslary hakynda” Türkmenistanyň Konstitusion kanunyň kabul edilmegi barada aýratyn nygtaldy.
Çykyşlarda bellenişi ýaly, täze taryhy döwrümizde geçirilen bu mejlisde döwlet we halk bähbitli öňde goýlan wezipeler Türkmenistanyň Halk Maslahatynyň jemgyýetimizde we umuman, ýurdumyzda eýeleýän ornunyň uludygyny nobatdaky gezek tassyklaýar.
Maslahatyň ahyrynda oňa gatnaşyjylar ilatymyzyň abadan, asuda we sagdyn durmuşyny üpjün etmek ugrunda beýik işleri amala aşyrýan hormatly Prezidentimize, Milli Liderimize köp sagbolsun aýdyp, Arkadagly Serdarymyzyň, Gahryman Arkadagymyzyň janlarynyň sag, ömürleriniň uzak bolmagyny, il-ýurt bähbitli, dünýä ähmiýetli işleriniň hemişe rowaçlyklara beslenmegini tüýs ýürekden arzuw etdiler.
Şyhdurdy ŞYHYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.