TÜRKMENISTANYŇ GYZYL ÝARYMAÝ MILLI JEMGYÝETINIŇ GURAMAGYNDA ÇÄRE GEÇIRILDI
2026-njy ýylyň 14-nji sentýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Gyzyl Ýarymaý Milli jemgyýetiniň guramagynda “Milli jemgyýetiň ynsanperwerlik işinde kömekçi wezipesini goldamak” atly taslamanyň çäginde “Halkara ynsanperwer hukugy we köp taraplaýyn diplomatiýa” atly çäre geçirildi.
Geçirilen çärede, Türkmenistanyň Gyzyl Ýarymaý Milli jemgyýetiniň wekili çykyş edip, 1926-njy ýylda döredilen Türkmenistanyň Gyzyl Ýarymaý Milli jemgyýetiniň häzirki wagta çenli alyp barýan işleri, “Türkmenistanyň Gyzyl Ýarymaý Milli jemgyýeti hakynda” kanuny, 1949-njy ýylyň 12-nji awgustyndaky Ženewa konwensiýasy we 1977-nji ýylyň 8-nji iýunyndaky Goşmaça teswirnamasy hakynda giňişleýin gürrüň berdi.
Şeýle-de, Türkmenistanyň Gyzyl Ýarymaý Milli jemgyýetiniň wekilleri tarapyndan taýýarlanan soraglara talyp ýaşlarymyz uly gyzyklanma bilen jogap berdiler we sowgatlara mynasyp boldular.
Perhat AGAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň 1-nji ýyl talyby