Türkmenistanyň Garaşsyzlyk güni mynasybetli geçirilen ylmy-amaly maslahat
2022-nji ýylyň 22-nji sentýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Garaşsyzlyk güni mynasybetli “Bitarap Türkmenistanyň Garaşsyzlyk ýyllarynda daşary syýasatynda we diplomatiýasynda gazanan üstünlikleri” atly ylmy-amaly maslahaty geçirildi. Maslahata Türkmenistanyň Döwlet, hukuk we demokratiýa institutynyň wekilleri, Türkmenistanyň Daşary işler ministrliginiň Halkara gatnaşyklary institutynyň we beýleki ýokary okuw mekdepleriniň mugallymlarydyr talyplary şeýle-de «Ýaş diplomatlar» mekdebiniň işjeň agzalary bolan mekdep okuwçylary gatnaşdylar.
Maslahatyň umumy mejlisinde “Garaşsyzlykdan gözbaş alýan durmuş-ynsanperwer ösüşler we kanunçylygyň kämilleşdirilişi”, “Garaşsyzlyk ýyllaryň içinde bilim ulgamynyň ösüşi”, “Garaşsyzlyk ýyllarynda Türkmenistanda döwlet-hususy hyzmatdaşlygy ösdürmegiň ileri tutulýan ugurlary”, “Garaşsyzlyk – ýürekleriň buýsanjy” atly temalar boýunça çykyşlar edildi.
Ylmy-amaly maslahat öz işini “Garaşsyzlyk – milli diplomatiýany köpugurly ösdürmegiň gözbaşy”, “Garaşsyzlyk we milli demokratiýanyň kanunçylyk binýadynyň kemala gelmegi”, “Garaşsyzlyk ýyllarynda: milli ykdysadyýet ösüşiň täze ýoly bilen”, “Mukaddes Garaşsyzlyk – bagtyýarlyk döwrümiziň gözbaşy” atly bölümçelerde dowam etdirdi. Bölümçelerde Türkmenistanyň Konstitusiýasynyň kämilleşdirilişi, ýurdumyzyň ynsanperwerlik syýasatynyň dabaralanyşy, hukuk ulgamynyň ösüşi, milli kanunçylykda ýaşlaryň hukuk goraglylygynyň kepillendirmeleri, halkara ekologiýa hyzmatdaşlygynyň kämilleşdirilişi hem-de Garaşsyzlyk döwründe ýurdumyzyň ähli pudaklarynda ýetilen sepgitleri barada köp sanly çykyşlar diňlenildi.
Merjen GURBANNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş
kafedrasynyň uly mugallymy.