Türkmenistanyň Daşary işler ministrliginiň Halkara gatnaşyklary instituty bilen Ýaponiýanyň Soka uniwersitetiniň arasyndaky hyzmatdaşlyk
2024-nji ýylyň 22-nji ýanwarynda Ýaponiýanyň Tokio şäheriniň «New Otani» myhmanhanasynda Türkmenistanyň Daşary işler ministrliginiň Halkara gatnaşyklary institutynyň rektory J.Gurbangeldiýew bilen Ýaponiýanyň Soka uniwersitetiniň prezidenti Masaşi Suzuki hem-de şol uniwersitetiň professor-mugallymlarynyň arasynda duşuşyk guraldy.
Duşuşygyň başynda Türkmenistanyň Daşary işler ministrliginiň Halkara gatnaşyklary institutynyň rektory bu ýokary okuw jaýy hakynda gürrüň berip, Türkmenistanyň ýaşlar syýasaty bilen ýapon tarapyny tanyşdyrdy we hyzmatdaşlygy ýola goýmak üçin birnäçe teklipleri hödürledi. Taraplar talyp alyş-çalşygy, mugallymlaryň Halkara gatnaşyklary institutynyň talyplaryna sanly ulgam arkaly sapak geçmek ýaly teklipler bilen ylalaşdylar.
Türkmenistanyň Daşary işler ministrliginiň Halkara gatnaşyklary institutynyň rektory J.Gurbangeldiýew «Pähim-paýhas ummany Magtymguly Pyragy» ýyly diýlip atlandyrylan 2024-nji ýylyň dowamynda Magtymguly Pyragynyň 300 ýyllygyna bagyşlanyljak çärelere gatnaşmaga çagyrdy. Bu babatda Soka uniwersitetiniň prezidenti, şeýle-de professor-mugallymlary uly gyzyklanma bildirdiler. Türkmenistanyň Daşary işler ministrliginiň Halkara gatnaşyklary institutynyň rektory J.Gurbangeldiýew ýapon tarapyna ýadygärlik sowgat hökmünde türkmen halysyny, şeýle-de institutyň talyplarynyň ýapon we iňlis dillerinde işläp taýýarlan wideoroliklerini gowşurdy.
Iki tarapyň arasynda hyzmatdaşlygy ýola goýmak barada ylalaşylandan soňra, Türkmenistanyň Daşary işler ministri R.Meredowyň gatnaşmagynda duşuşyk geçirildi. Ol duşuşykda Türkmenistanyň Daşary işler ministri R.Meredow Soka uniwersitetiniň prezidentini diňläp, Halkara gatnaşyklary institutynda Soka uniwersitetiniň şahamçasyny açmak, talyplaryň we mugallymlaryň alyş-çalyş maksatnamasyny işläp düzmek we durmuşa geçirmek, türkmen talyplaryna Ýaponiýada okamak üçin mümkinçilik döretmek ýaly teklipleri bilen çykyş etdi.
Mundan başga-da, duşuşygyň barşynda Türkmenistanyň Daşary işler ministri R. Meredow Soka uniwersitetiniň prezidentine türkmen halysyny sowgat hökmünde gowşurdy. Duşuşygyň ahyrynda bolsa, Türkmenistanyň Daşary işler ministrliginiň Halkara gatnaşyklary instituty bilen Ýaponiýanyň Soka uniwersitetiniň arasynda özara düşünişmek hakynda Ähtnama gol çekildi.
Gülruh GELDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby
Bu barada şu ýerde hem okap bilersiňiz: