Türkmenistan – Yslam ösüş banky: hyzmatdaşlygyň hormatyna berlen sowgat
2023-nji ýylyň 6-njy iýulynda Türkmenistanyň Daşary işler ministrliginiň Halkara gatnaşyklary institynda Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyza Yslam ösüş bankynyň prezidenti Ahmad Mohamed Ali Al-Madani tarapyndan sowgat berlen “Yslam ösüş banky we Doktor Ahmad Mohammad Ali. Institutyň taryhy we onuň Prezidentiniň ýoly” atly kitabyň tanyşdyryş dabarasy geçirildi. Oňa Türkmenistanyň Daşary işler ministrliginiň, Türkmenistanyň Ministrler Kabinetiniň ýanyndaky Ulag we kommunikasiýalar agentliginiň, Türkmenistanyň Mejlisiniň, Türkmenistanyň Saglygy goraýyş we derman senagaty ministrliginiň, “Türkmengaz” döwlet konserniniň, Türkmenistanyň Senagatçylar we telekeçiler birleşmesiniň ýolbaşçylary we wekilleri, Türkmenistanda akkreditirlenen daşary ýurt döwletleriniň we halkara guramalarynyň diplomatik wekilhanalarynyň ýolbaşçylary, Türkmenistanyň ykdysadyýet, maliýe we bank toplumynyň ýolbaşçylary, ýurdumyzyň ugurdaş ýokary okuw mekdepleriniň rektorlary, professor-mugallymlary we talyp ýaşlary gatnaşdylar.
Dabaranyň öň ýanynda oňa gatnaşyjylar Türkmenistanyň Saglygy goraýyş we derman senagaty ministrliginiň, Türkmenistanyň Döwlet daşary ykdysady iş bankynyň, “Türkmengaz” döwlet konserniniň, “Türkmendemirýollary” agentliginiň “Türkmendeňizderýaýollary” agentliginiň, Türkmenistanyň Senagatçylar we telekeçiler birleşmesiniň, Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Türkmenistanyň Daşary işler ministrliginiň Halkara gatnaşyklary institutynyň, Türkmen döwlet ykdysadyýet we dolandyryş institutynyň, Türkmen döwlet maliýe institutynyň gatnaşmaklarynda gurnalan Türkmenistan bilen Yslam ösüş bankynyň bilelikdäki taslamalaryna we dürli ugurlar boýunça hyzmatdaşlygyna bagyşlanan serginiň işine syn etdiler.
Dabarada çykyş edenler Türkmenistanyň Yslam ösüş banky bilen gatnaşyklarynyň taryhy we häzirki ýagdaýy, ony ösdürmegiň geljekki ugurlary, hususan-da, üstaşyr-ulag geçelgeleriniň gurluşygynda ikitaraplaýyn hyzmatdaşlygyň mümkinçilikleri, ýurdumyzda amala aşyrylýan giň möçberli taslamalaryň durmuşa geçirilmeginde Yslam ösüş bankynyň aýratyn ähmiýeti dogrusynda bellediler. Dabaranyň ahyrynda oňa gatnaşyjylaryň ählisi Gahryman Arkadagymyzy Türkmenistan bilen Yslam ösüş bankynyň hyzmatdaşlygyna bagyşlanan kitabyň sowgat berilmegi bilen gutladylar we Gahryman Arkadagymyza, Arkadagly Serdarymyza hoşniýetli arzuwlaryny beýan etdiler.
Mährijemal MÄMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň uly mugallymy.
Şeýle hem bu barada şu ýerden okap bilersiňiz: