Türkmenistan bilen Ýewropa Bileleşiginiň arasyndaky hyzmatdaşlyga bagyşlanan onlaýn okuw sapagy
2021-nji ýylyň 3-nji iýunynda Türkmenistanyň Daşary işler ministrliginiň Halkara gatnaşyklary institutynda «Türkmenistan bilen Ýewropa Bileleşiginiň arasyndaky hyzmatdaşlyk» atly tema bagyşlanan, onlaýn görnüşde okuw sapagy geçirildi. Türkmenistanyň daşary ýurtlardaky diplomatik wekilhanalarynyň ýolbaşçylarynyň geçirýän toplumlaýyn onlaýn sapaklarynyň çäginde guralan bu okuw sapagyna Türkmenistanyň Belgiýa Patyşalygyndaky Adatdan daşary we Doly ygtyýarly ilçisi Ataýew Çary Kakamyradowiç we institutyň talyplary gatnaşdylar.
Bu okuw sapagy ýokary okuw mekdebiň talyplarynyň diplomatiýa bilen bagly bilim derejelerini has-da kämilleşdirmek maksady bilen geçirildi. Okuw sapagynda çykyş eden hormatly ilçi Türkmenistanyň Ýewropa Bileleşigi bilen özara gatnaşyklaryň, howpsuzlyk hem-de söwda ykdysady, ulag we energetika ulgamlarynda ikitaraplaýyn we köptaraplaýyn hyzmatdaşlygyň has-da ösýändigini we giňelýändigini belläp geçdi. Bilim, daşky gurşawy goramak, ykdysadyýet, hususy telekeçiligi hem-de oba-hojalygyny goldamak ulgamlarynda durmuşa geçirilýän we häzirki wagtda amala aşyrylýan bilelikdäki taslamalaryň hem-de maksatnamalaryň onlarçasynyň gatnaşyklaryň netijeli ösdürilýändigine düýpli şaýatlyk edýändigini nygtady.
Okuw sapagynyň ahyrynda talyplar ilçä Türkmenistan bilen Belgiýa Patyşalygynyň arasyndaky dostlukly we özara bähbitli hyzmatdaşlygy has-da ösdürmäge gönükdirilen sowallary berdiler we bu ugurda özara pikir alyşdylar.
Merjen JUMAGYLYJOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.