Türkmen-rus ylym-bilim gatnaşyklarynyň gerimi barha giňeýär
Mälim bolşy ýaly, «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara serginiň we ylmy maslahatyň çäklerinde Türkmenistanyň Daşary işler ministrliginiň Halkara gatnaşyklary instituty bilen W.N.Tatişew adyndaky Astrahan döwlet uniwersitetiniň arasynda özara düşünişmek hakynda Ähtnama gol çekildi. Bu Ähtnama iki döwletiň arasyndaky ylym-bilim gatnaşyklarynyň ösdürilmeginde möhüm taryhy tapgyry alamatlandyrdy.
Häzirki wagtda türkmen-rus gatnaşyklarynyň ylym we bilim ugry aýratyn ähmiýete eýe bolmak bilen, hil taýdan täze derejä çykýar. Munuň şeýledigini 2023-nji ýylyň 12-nji oktýabrynda W.N.Tatişew adyndaky Astrahan döwlet uniwersitetiniň halkara hyzmatdaşlyk meseleleri boýunça prorektory Angelina Fadinanyň türkmen diplomatiýasynyň milli mekdebiniň professor-mugallymlarynyň we talyp ýaşlarynyň öňünde çykyş etmegi doly subut edýär. Russiýa Federasiýasynyň abraýly ýokary okuw mekdebiniň ýolbaşçysy öz çykyşynda türkmen-rus gatnaşyklary, ylym-bilim hyzmatdaşlygynyň ösüşi, bilelikdäki taslamalaryň amala aşyrylmagy, W.N.Tatişew adyndaky Astrahan döwlet uniwersitetiniň ylym we bilim işiniň aýratynlyklary barada giňişleýin gürrüň berdi. Hormatly myhman Türkmen halkynyň Milli Lideriniň tagallalary bilen açylyp ulanylmaga berlen institutyň binalar toplumynyň, okuw otaglarynyň, mejlisler zallarynyň, türkmen diplomatiýasynyň milli muzeýiniň, institutyň merkezleriniň enjamlaşdyrylyşy we mümkinçilikleri bilen tanyşdy. Hususan-da, mertebeli myhman Türkmen diplomatiýasynyň milli muzeýine, «Parahatçylygyň medeniýeti» ÝUNESKO klubyna, «Hindi burçuna», institutyň okuw studiýasyna, «Parahatçylygyň ýaş çaparlary» akyl-paýhas bäsleşiginiň geçýän ýeri bolan Ak öýe aýlanyp gördi. W.N.Tatişew adyndaky Astrahan döwlet uniwersitetiniň prorektorynyň türkmen diplomatiýasynyň milli mekdebine sapary iki ýokary okuw mekdebiniň netijeli hyzmatdaşlygynyň mundan beýläk-de ösüş häsiýetine eýe boljakdygyny aýdyňlygy bilen görkezdi.
Ýeri gelende bellesek, türkmen diplomatiýasynyň milli mekdebi Russiýa Federasiýasynyň abraýly ýokary okuw mekdepleriniň ençemesi bilen netijeli gatnaşyklary alyp barýar. 2017-nji ýylyň 2-nji oktýabrynda Russiýa Federasiýasynyň Prezidentiniň ýurdumyza amala aşyran saparynyň çäklerinde hem ýurdumyzyň ýokary okuw mekdepleri bilen Russiýanyň ýokary okuw mekdepleriniň arasynda ençeme ylalaşyklaryň baglaşylmagy bilim ulgamynda halkara hyzmatdaşlygyň esasynda ylmy gatnaşyklary ösdürmäge mümkinçilik berdi. Şol baglaşylan resminamalaryň arasynda Türkmenistanyň DIM-niň Halkara gatnaşyklary instituty bilen Russiýa Federasiýasynyň DIM-niň Moskwanyň Halkara gatnaşyklary döwlet institutynyň (uniwersitetiniň) arasynda hyzmatdaşlyk etmek hakynda Ylalaşygyň bolmagyny hem bellemek gerek.
2023-nji ýylyň martynda Türkmenistanyň Daşary işler ministrliginiň Halkara gatnaşyklary instituty bilen Russiýa Federasiýasynyň Kazan (Priwolžsk) döwlet federal uniwersiteti bilen özara düşünişmek hakynda Ähtnama baglaşyldy.
Hormatly Prezidentimiziň ýakyndan ýardam bermeginde Russiýa Federasiýasynyň ylym ojaklary bilen biziň institutymyzyň arasynda ýygjam gatnaşyklar işjeň alnyp barylýar. Institutymyzyň mugallymlarynyň we talyplarynyň Russiýa Federasiýasynda geçýän dürli ylmy we medeni ähmiýetli çärelere gatnaşmagy däp bolan hadysa öwrüldi. Türkmenistanyň Daşary işler ministrliginiň Halkara gatnaşyklary institutynyň talyplary we mugallymlary «Halkara ynsanperwer hukugy boýunça Martens okaýyşlary», «Maliýe howpsuzlygy» atly maslahatlara we bäsleşiklere, «СелиАС» atly ýaşlar üçin halkara maslahata işjeň gatnaşdylar.
Şeýlelik bilen, däp bolan dostluga esaslanýan türkmen-rus gatnaşyklarynyň medeni-ynsanperwer ugry Berkarar döwletiň täze eýýamynyň Galkynyşy döwründe hil taýdan täze derejä çykýar. Hormatly Prezidentimiz tarapyndan alnyp barylýan işler bolsa, bu gatnaşyklaryň mundan beýläk hem ösmegine giň şertleri döredýär.
Merdan BERDINYÝAZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary we diplomatiýa kafedrasynyň uly mugallymy.