Türkmen-rus diplomatik gatnaşyklarynyň 30 ýyllygy mynasybetli tegelek stol
2022-nji ýylyň 11-nji aprelinde türkmen-rus diplomatik gatnaşyklarynyň 30 ýyllygy mynasybetli wideoaragatnaşyk arkaly tegelek stol geçirildi. Duşuşygyň barşynda taraplar Türkmenistanyň Prezidenti Serdar Berdimuhamedowy täze wezipä girişmegi bilen gutladylar we onuň alyp barýan daşary syýasy işlerinde uly üstünlikleriň ýar bolmagyny arzuw etdiler.
Duşuşykda Russiýa Federasiýasynyň Daşary işler ministrliginiň Moskwa döwlet Halkara gatnaşyklary institutynyň Ýewraziýa barlag merkeziniň müdiri Iwan Alekseýewiç Safrançuk, Russiýa Federasiýasynyň DIM-niň MDHGI-niň rektory Russiýanyň Ylymlar akademiýasynyň akademigi Anatoliý Wasilýewiç Torkunow, Türkmenistanyň Russiýa Federasiýasyndaky Adatdan daşary we Doly ygtyýarly ilçisi Batyr Nyýazlyýew, Russiýa Federasiýasynyň DIM-niň GDA döwletleriniň 3-nji departamentiniň müdiri Aleksandr Wadimowiç Sternik, Türkmenistanyň Daşary işler ministrliginiň Halkara gatnaşyklary institutynyň rektory Jumamyrat Gurbangeldiýew, Azerbeýjan Respublikasynyň Russiýa Federasiýasyndaky Adatdan daşary we Doly ygtyýarly ilçisi Polat Bilbil ogly, Özbegistan Respublikasynyň Russiýa Federasiýasyndaky Adatdan daşary we Doly ygtyýarly ilçisi Batyrjan Asadow, Belarus Respublikasynyň Russiýa Federasiýasyndaky medeni toplumynyň başlygy we baş geňeşçisi Aleksandr Iwanowiç Slobodçuk, Russiýa Federasiýasynyň DIM-niň MDHGI-niň Halkara barlag institutynyň müdiri Maksim Aleksandrowiç Suçkow, Russiýa Federasiýasynyň Adatdan daşary we Doly ygtyýarly Wekili, Russiýa Federasiýasynyň DIM-niň MDHGI-niň ýewraziýa barlag Merkeziniň ylmy işgäri Stanislaw Iwanowiç Çernýawskiý, Adatdan daşary we Doly ygtyýarly ilçi, professor, Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary kafedrasynyň müdiri Amangeldi Rahmanow we beýlekiler çykyş etdiler. Olar öz çykyşlarynda ilki bilen türkmen-rus diplomatik gatnaşyklarynyň 30 ýyllygyny mähirli gutladylar. Hem-de taryh üçin şeýle ujypsyz wagtyň içinde ikitaraplaýyn gatnaşyklaryň ykdysady, energetika, oba hojalygy, nebit-himiýa we senagatyň beýleki pudaklary babatda ýokary derejä ýetendigini belläp geçdiler.
Gepleşigiň soňunda oňa gatnaşyjylar türkmen-rus diplomatik gatnaşyklarynyň 30 ýyllygyny ýene-de bir gezek gutladylar hem-de döwletleriň içeri we daşary syýasatynda alyp barýan işlerine rowaçlyklary arzuw etdiler.
Batyr ESENOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.