Türkmen paýtagtynda halkara sergi we ylmy maslahat dabaraly açyldy
2024-nji ýylyň 9-njy oktýabrynda paýtagtymyzdaky Olimpiýa şäherçesiniň
Başa-baş söweş sungaty sport toplumynda ýurdumyzda giňden bellenilýän Saglygy
goraýyş we derman senagaty işgärleriniň güni mynasybetli «Saglygy goraýyş,
bilim we sport Berkarar döwletiň täze eýýamynyň Galkynyşy döwründe» atly
halkara serginiň we onuň çäklerindäki ylmy maslahatyň dabaraly açylyşy boldy.
Saglygy goraýyş we derman senagaty ministrliginiň, Bilim ministrliginiň,
Bedenterbiýe we sport baradaky döwlet komitetiniň bilelikde guramagynda
geçirilýän forumyň açylyş dabarasyna Ministrler Kabinetiniň Başlygynyň
orunbasarlary, daşary döwletleriň we halkara guramalaryň ýurdumyzdaky
diplomatik wekilhanalarynyň, ministrlikleriň we pudaklaýyn dolandyryş
edaralarynyň, köpçülikleýin habar beriş serişdeleriniň ýolbaşçylary we wekilleri,
milli saglygy goraýyş ulgamynyň işgärleri, hormatly ýaşulular, talyp ýaşlar, şol
sanda Türkmenistanyň Daşary işler ministrliginiň Halkara gatnaşyklary
institutynyň mugallymlarydyr talyplary hem gatnaşdylar. Myhmanlar hormatly
Prezidentimiz Serdar Berdimuhamedowyň foruma gatnaşyjylara iberen Gutlagyny
uly ruhubelentlik bilen diňlediler.
Halkara sergide ýurdumyzyň saglygy goraýyş ulgamynyň ösüş depgini,
Türkmenistanyň lukmançylyk ylmynda we senagatynda, ilatyň saglygyny
goramakda ýeten sepgitleri, ägirt uly kuwwaty, daşary ýurtly hyzmatdaşlaryň bu
ulgamdaky işjeň gatnaşyklara barha artýan gyzyklanmalary öz beýanyny tapýar.
Foruma Hytaý Halk Respublikasyndan, Italiýa Respublikasyndan, Russiýa
Federasiýasyndan, Amerikanyň Birleşen Ştatlaryndan, Beýik Britaniýadan,
Rumyniýadan, Singapurdan, Ýaponiýadan, Koreýa Respublikasyndan,
Gazagystandan, Özbegistandan, Gyrgyzystandan, Katardan we Belarussiýadan
degişli wekiller hem-de halkara hyzmatdaşlyk boýunça hünärmenler gatnaşmaga
çagyryldy.
Serginiň çäklerinde habar beriş serişdeleriniň wekilleri, žurnalistler üçin
niýetlenen ýörite media meýdançasynyň döredilendigini aýratyn bellemek gerek.
Bu ýerde Türkmenistanyň Daşary işler ministrliginiň Halkara gatnaşyklary
institutynyň mugallymlarydyr talyplary telegepleşikleri gurap, sergä gatnaşyjylaryň
ýürek buýsançlaryny ýazgy etdiler. Munuň özi geljekki halkaraçy žurnalistleriň
nazary bilimlerini çuňlaşdyryp, amaly endiklerini kämilleşdirmegi üçin oňyn
şertdir.
Sergide ýaýbaňlandyrylan dünýäniň ösen döwletleriniň ýurdumyzdaky
ilçihanalarynyň diwarlyklary has-da köp adamly boldy. Aýratynam, Amerikanyň
Birleşen Ştatlarynyň Türkmenistandaky ilçihanasynyň diwarlygy myhmanlar, iňlis
dilini öwrenýänler, halkaraçy hünärmenler üçin has-da özüne çekiji boldy. Sergide
wekilçilik eden amerikan wekilleri şu gezekki forumyň halkara ähmiýeti, bilimi
ösdürmegiň mümkinçilikleri, şeýle-de ABŞ-nyň halkara bilim maksatnamalary,
olaryň esasynda bu döwlete okuwa gitmegiň ýollary hakda giňişleýin
düşündirdiler.
Halkara sergide Hytaý Halk Respublikasynyň «Pekin Chusse Biotehnology
Co., Ltd» kompaniýasynyň söwda direktory Saý Pin bu forumyň ähmiýeti,
Hytaýyň saglygy goraýyş ulgamynda özleriniň kompaniýasynyň alyp barýan işleri
barada şeýle gürrüň berdi:
— Biziň kompaniýamyz, esasan, lukmançylykda dürli keselleri anyklamaga
ýardam berýän test serişdelerini, lukmançylyk maksatly enjamlary hödürleýär.
Şunda alym-lukmanlarymyz biolukmançylygyň usullaryna esaslanýarlar. Biz
Türkmenistana ilkinji gezek geldik. Hem-ä öz önümlerimizi dostlukly ýurduň
lukmançylygyna ornaşdyrmak isleýäris, hemem şu serginiň üsti bilen bu ugurda
dünýä döwletleri bilen hyzmatdaşlygy ilerletmek baş maksadymyzdyr.
Halkara sergide Türkmenistanyň Bilim ministrliginiň pawilýony
myhmanlaryň uly gyzyklanmasyna eýe boldy. Bu ýerde Gahryman
Arkadagymyzyň hem-de hormatly Prezidentimiziň kitaplary, bilim bermegiň
häzirki zaman ulgamyndaky innowasion tehnologiýalar, «eMekdep» ulgamynyň
aýratynlyklary, talyp ýaşlaryň, mekdep okuwçylarynyň gazanan üstünlikleri,
umuman, üstünlikli durmuşa geçirilýän bilim özgertmeleri öz beýanyny tapypdyr.
Jemläp aýdanyňda, şu gezekki halkara forum lukmançylyk ylmynyň, bilim,
sport ulgamlarynyň soňky gazananlaryny durmuşa ornaşdyrmaga we daşary ýurtly
hyzmatdaşlar bilen gatnaşyklary mundan beýläk-de pugtalandyrmaga ýardam
berýän abraýly forumlaryň birine öwrüldi. TDH-da habar berlişi ýaly, «Saglygy
goraýyş, bilim we sport Berkarar döwletiň täze eýýamynyň Galkynyşy döwründe»
atly halkara sergi 12-nji oktýabra çenli dowam eder.
Atamyrat ÝAZWELIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.