Türkmen medeniýetine we Magtymgulynyň edebi mirasyna bagyşlanan ylmy-amaly maslahat
2023-nji ýylyň 22-nji iýunynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Medeniýet we sungat işgärleriniň hem-de Magtymguly Pyragynyň şygryýet güni mynasybetli “Magtymguly Pyragynyň ynsanperwer garaýyşlary: medeniýet parahatçylygy dörediji guraldyr” atly ylmy-amaly maslahat geçirildi. Maslahata Türkmenistanyň Döwlet, hukuk we demokratiýa institutynyň ylmy işgärleri, ýurdumyzyň ýokary okuw mekdepleriniň we institutymyzyň professor-mugallymlary, talyp ýaşlary gatnaşdylar. Maslahatyň umumy mejlisinde çykyş edenler halkymyzyň medeni mirasynyň, Magtymgulynyň döredijiliginiň gymmatynyň, dürli halklaryň dillerine terjime edilen sopuçylyk, liriki, pendi-nesihat häsiýetli şygyrlarynyň, türkmen zenanlarynyň keşbini wasp edýän goşgularynyň ähmiýetini beýan etdiler. Maslahatyň ahyrynda oňa gatnaşyjylar Magtymgulynyň arzuw eden gözel durmuşyny, onuň garaşan ajap eýýamyny türkmen halkyna bagyşlap, halkyň bähbidi, asuda ýaşaýşy barada yzygider alada edýän türkmen halkynyň Milli Lideri Gahryman Arkadagymyza, peder ýoluny parasatlylyk bilen dowam etdirýän hormatly Prezidentimize rowaçlyklar arzuw etdiler!
Maslahat “Magtymguly Pyragynyň döredijiligi – parahatçylygy söýüjiligiň belent ýörelgesi”, “Medeniýet – jemgyýetiň ruhy durmuşynyň ýörelgesi”, “Türkmenistanyň ykdysadyýeti we medeniýeti biri-biri bilen baglanyşykly güýçdür”, “Magtymguly Pyragy – şygryýet dünýäsiniň şamçyragy” atly bölümçelerde dowam etdi.
Mährijemal MÄMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň uly mugallymy.