TÜRKMEN-HYTAÝ MEDENI GATNAŞYKLARY: GELJEGE ÖSÜŞ
2026-njy ýylyň 11-13-nji maýy aralygynda Türkmenistanyň Daşary işler ministrliginiň Halkara gatnaşyklary institutynda “Türkmenistanyň daşary syýasaty we diplomatiýasy: parahatçylygyň, howpsuzlygyň we durnukly ösüşiň hatyrasyna hyzmatdaşlyk” atly halkara ylmy-amaly maslahatynyň hem-de “Halkara gatnaşyklary: parahatçylyk dialogynyň medeniýeti” atly III halkara bäsleşiginiň çäklerinde talyplar üçin ýörite okuw maslahatlary guralýar.
Dünýäniň dürli künjeklerinden halkara ylmy-amaly maslahata gatnaşmaga gelen professor-mugallymlar talyplarymyz bilen öz iş tejribeleri barada söhbetdeş boldular. Hususan-da, 2026-njy ýylyň 11-nji maýynda Lançžou uniwersitetiniň Syýasat we halkara gatnaşyklar institutynyň professory, Türkmenistany öwreniş merkeziniň direktory Wan Sihaiň gatnaşmagynda okuw maslahaty geçirildi. Okuw maslahatynda professor öz alyp barýan işleri, Lançžou uniwersitetiniň ýanynda hereket edýän “Türkmenistany öwreniş” merkeziniň ähmiýeti we onuň döredilmeginiň maksatlary barada giňişleýin maglumat berdi. Şeýle-de, görnükli alymyň Magtymguly Pyragynyň we hytaý şahyrlarynyň filosofik garaýyşlarynyň meňzeşlikleri baradaky täsirli çykyşy talyplarda uly gyzyklanma döretdi. Lançžou uniwersitetiniň Syýasat we halkara gatnaşyklar institutynyň dosenti Pu Sang bolsa “Hytaý tagamlaryndan Hytaý siwilizasiýasyna çenli” diýen mowzuk boýunça çykyş edip, hytaý halkynyň baý medeniýeti bilen tanyşdyrdy. Gatnaşyjylaryň alymlar bilen gyzykly sowal-jogap alyşmalary duşuşygyň ähmiýetini has-da artdyrdy.
Bu okuw maslahaty talyplary türkmen-hytaý gatnaşyklarynyň berkidilmegine mynasyp goşant goşmaga uly höwes döretdi we olary hytaý dilini has düýpli öwrenmäge ruhlandyrdy.
Enejan ORAZMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallymy