Türkmen halysynyň milli muzeýine gezelenç guraldy
2023-nji ýylyň 26-njy ýanwarynda Türkmen halysynyň milli muzeýine Türkmenistanyň Daşary işler ministrliginiň Halkara gatnaşyklary institutynyň talyp gyzlarynyň gatnaşmagynda gezelenç gurnaldy. Gezelenjiň dowamynda talyp gyzlar türkmen zenanlarynyň yhlasyndan syzlyp çykan deňsiz-taýsyz, gadymy türkmen halylarynyň dokalyş taryhy, milli nagyşlaryň döreýşi, haly gölleriniň tapawutly aýratynlyklary barada täsin maglumatlar bilen tanyşdylar. Bu muzeýde özüniň nepisligi, dokalyş aýratynlygy, döreýiş taryhy boýunça tapawutlanýan 2000-e golaý haly eksponatlary bar. Şol halylaryň arasynda 2017-nji ýylda ýurdumyzda geçirilen Ýapyk binalarda we söweş sungaty boýunça V Aziýa oýunlaryndaky sportuň dürli görnüşleri şekillendirilen ajaýyp halysy hem bar.
Türkmen zenanlarynyň müňýyllyklaryň dowamynda döreden milli gymmatlyklaryny gorap saklamakda, öz milliligimize bolan söýgini ösdürmekde we gelejekki nesillerimize ýetirmekde şeýle gezelençleriň ähmiýeti örän uludyr.
Güljeren ATAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara
ykdysady gatnaşyklary
fakultetiniň 1-nji ýyl talyby.