Türkmen diplomatiýasynyň milli mekdebiniň döredilmeginiň 15 ýyl dolmagy mynasybetli Durnukly ösüş maksatlar boýunça ylmy-usulyýet merkezinde geçirilen okuw sapagy
2023-nji ýylyň 20-nji martynda Türkmenistanyň Daşary işler ministrliginiň Halkara gatnaşyklary institutynda türkmen diplomatiýasynyň milli mekdebiniň döredilmeginiň 15 ýyl dolmagy mynasybetli Durnukly ösüş maksatlar boýunça ylmy-usulyýet merkezinde Birleşen Milletler Guramasynyň Adam hukuklary boýunça ýokary komissarynyň müdirliginin milli maksatnamasynyň kordinatory Ýelena Butowanyň hem-de institutymyzyň talyplarynyň gatnaşmagynda okuw sapagy geçirildi.
Okuw sapagynyň dowamynda hanym Ýelena Butowa, institutymyzyň talyp ýaşlaryna,Türkmenistanyň Birleşen Milletler Guramasynyň adam hukuklary boýunça ýöriteleşdirilen düzümleri bilen özara hereketlerini has hem ösdürmegiň meseleleri barada alnyp barylýan işler barada gürrüň berdi. Şeýle hem bar bolan meseleleri ara alyp maslahatlaşmak we adam hukuklary çygrynda ýerine ýetirilmeli işleri kesgitlemek üçin taraplaryň arasyndaky gepleşikleri birek-birege ynanyşmak we aýanlyk ýörelgeleri esasynda alyp barmaklygyň zerurdygy barada nygtap geçdi.
Ýeri gelende belläp geçsek, Türkmenistanda Adam hukuklary boýunça 2021 – 2025-nji ýyllar üçin Hereketleriň milli meýilnamasy 2021-nji ýylyň aprelinde kabul edilip, Türkmenistanda adam hukuklaryny we azatlyklaryny üpjün etmek we goramak boýunça milli ulgamy güýçlendirmäge, ýurduň bu ugurdaky halkara borçnamalaryny ýerine ýetirmäge, şeýle hem halkara guramalar bilen ynsanperwer hyzmatdaşlygy giňeltmäge gönükdirildi. Bu hem ýurdumyzda adam hukuklaryny goramakda uly işleriň alnyp barylýandygyndan aýdyň nyşandyr.
Şasenem MEÝLISOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň
I ýyl talyby.