«Türkmen bedewi we dünýä seýisçilik sungaty» atly webinar geçirildi
2025-nji ýylyň 27-nji fewralynda Türkmenistanyň Daşary işler ministrliginiň Halkara gatnaşyklary institutynda «Parahatçylyk medeniýeti» ÝUNESKO klubynyň guramagynda «Türkmen bedewi we dünýä seýisçilik sungaty» atly webinar geçirildi. Oňa sanly wideoaragatnaşyk arkaly ýurdumyzyň ýokary okuw mekdeplerinde hereket edýän ÝUNESKO klublarynyň we kafedralarynyň işjeň agzalary gatnaşdylar.
Webinaryň dowamynda «Parahatçylyk medeniýeti» atly ÝUNESKO klubynyň başlygy Aýgözel Öwezowa, Aba Annaýew adyndaky Halkara atçylyk akademiýasynyň mugallymy Hydyr Orazgulyýew, Myrat Garryýew adyndaky Türkmenistanyň döwlet uniwersitetiniň «Dermanlyk ösümliklerimiz – saglygymyz, mirasymyz» atly ÝUNESKO klubynyň agzasy Läle Berdiýewa, Türkmenistanyň Daşary işler ministrliginiň Halkara gatnaşyklary institutynyň Jemgyýeti öwreniş ylymlary kafedrasynyň mugallymy Muhammet Süleýmanow dagy çykyş etdiler. Olar öz çykyşlarynda täze taryhy döwürde hormatly Prezidentimiziň baştutanlygynda milli medeniýetimizi we sungatymyzy ösdürmek, dünýäde giňden wagyz etmek boýunça giň gerimli işleriň durmuşa geçirilýändigi, sungatyň dürli ugurlary bilen bir hatarda, milli sirk sungatynyň ösdürilmegine hem möhüm ähmiýet berilýändigi, Gahryman Arkadagymyzyň başlangyjy esasynda 2010-njy ýylyň aprelinde Türkmenistanyň Döwlet sirkiniň gaýtadan işläp başlamagy bilen, milli sirk sungatynyň täzeden dikeldilendigi, häzirki günlerde meşhurlyga eýe bolan «Galkynyş» milli at üstündäki oýunlar toparynyň döwletimiziň halkara abraýyna mynasyp goşant goşýandygy barada buýsanç bilen bellediler. Aýratynda, Monako Knýazlygynyň Monte-Karlo şäherinde geçirilen halkara sirk sungaty festiwalynda gazanan üstünliginiň ähmiýeti dogrusynda nygtadylar. Şeýle-de türkmeniň ahalteke bedewleriniň aýratynlygy, atçylyk spotunyň adam saglygyna ýetirýän täsiri barada taryhy we ylmy maglumatlar esasynda giňişleýin gürrüň berdiler.
Webinaryň ahyrynda oňa gatnaşyjylar atçylyk sportyny ösdürmekde ähli mümkinçilikleri döredýän türkmen halkynyň Milli Lideri Gahryman Arkadagymyza, hormatly Prezidentimize sagbolsun aýtdylar.
Serdar BORJAKOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.