«TESOL26: GELJEK ÜÇIN IŇLIS DILI» ATLY OKUW MASLAHATY
2026-njy ýylyň 26—28-nji awgusty aralygynda Halkara ynsanperwer ylymlary we ösüş uniwersitetinde halkara derejesindäki «TESOL26: geljek üçin iňlis dili» atly giň gerimli okuw maslahaty üstünlikli geçirildi.
Bu abraýly bilim forumy Amerikanyň Birleşen Ştatlarynyň Türkmenistandaky Ilçihanasy, Halkara TESOL assosiasiýasy hem-de Türkmenistanyň Bilim ministrligi tarapyndan bilelikde gurnaldy. Oňa ýurdumyzyň ýokary okuw mekdeplerinden, bilim merkezlerinden, orta mekdeplerden mugallymlar we bilermenler bilen birlikde Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasynyň mugallymlary E.Orazmyradowa, A.Sätgeldiýewa, S.Nazarowa hem gatnaşdylar.
Üç günlük geçirilen maslahat bilim ulgamynda sanly tehnologiýalary, emeli aň (AI) hem-de döwrebap pedagogik usullary amaly sapaklara netijeli ornaşdyrmaga gönükdirildi. Maslahatyň çäklerinde halkara we ýerli hünärmenleriň, bilermenleriň gatnaşmagynda çykyşlar diňlenildi.
Maslahatyň birinji güni açylyş dabarasy we bilermen Dawid Kisanyň gepleşik başarnyklaryna baha bermek baradaky esasy çykyşy bilen başlandy. Şeýle hem Uilýam Nýuman, Tamrika Hwtisiaşwili, Liza Brisbois we Heýdi Faust ýaly halkara bilermenler emeli aňyň üsti bilen materiallary taýýarlamakda, ýazmaça baha bermekde we synp gözegçiligini guramakda ulanmagyň amaly usullary barada çykyş etdiler.
Maslahatyň ikinji güni ýerli bilermenler Meretguly Gurbanow, Ahmetnazar Hojanazarow, Gülaýym Kurbanowa, Begmämmet Akmämmedow, Bahar Bahbidowa presentasiýalar arkaly çykyş etdiler. Olar synplarda emeli aňdan peýdalanmak, çeper edebiýat arkaly aňy ösdürmek we beýniniň işjeňligine esaslanýan okatmak usullary barada tejribe paýlaşdylar. Günün ikinji ýarymynda mugallymlaryň hünär taýdan durnuklylygy hem-de duýgudaşlyk temalary ara alnyp maslahatlaşyldy.
Maslahatyň jemleýji gününde geljekki baha beriş ulgamlary, okuwçylary halkara synaglaryna taýýarlamak, “Emeli aň eýýamynda ESL/EFL sapaklaryny guramaga täzeden seretmek” atly amaly sapagy geçirildi. Soňra maslahata gatnaşyjylara şahadatnama gowşuryldy.
«TESOL26» maslahaty Türkmenistanyň bilim ulgamynda amala aşyrylýan giň göwrümli özgertmeler, sanly bilimi ösdürmäge, ýaş nesle döwrebap bilim bermäge we daşary ýurt dillerini çuňňur öwretmäge uly goldaw boldy. Maslahata gatnaşan mugallymlar alnan amaly bilimleriň sapaklaryň hilini ýokarlandyrmakda bähbitli boljakdygyny bellediler.
Aýna SÄTGELDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň uly mugallymy