«Tebigatyň goragy – Dünýäniň goragy! » şygary bilen geçirilen bäsleşik
2024-nji ýylyň oktýabr aýynyň 22-ne Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasynyň garamagynda «Tebigatyň goragy – Dünýäniň goragy!» şygar bilen hereket edýän «EcoClub» gurnagy tarapyndan BMG-niň döredilmeginiň 79 ýyllygy mynasybetli institutyň I ýyl talyplarynyň arasynda «International Organizations on Ecological Issues» atly bäsleşik geçirildi.
Ösüp gelýän ýaş nesliň gözýetimini giňeltmek, watançylyk, ynsanperwerlik duýgularyny ösdürmek, tebigata bolan söýgüni artdyrmak we daşky gurşaw goragyna çynlakaý çemeleşmek düşünjelerini kemala getirmek maksady bilen geçirilen bu bäsleşigiň I şerti boýunça toparlar BMG-niň Durnukly ösüş maksatlaryna we dünýäniň ekoulgamyny goramak boýunça, BMG-niň biologik köpdürlülik, çölleşmäge garşy göreşmek, howanyň üýtgemegi, ozon gatlagyny goramak, serhetüsti suw akymlaryny we halkara kölleri goramak, ÝUNESKO-nyň Bütindünýä medeni we tebigy mirasy goramak baradaky halkara guramalaryň işleri hakynda taýýarlanylan prezentasiýalar bilen çykyş etdiler. Bäsleşigiň II şertine laýyklykda, talyplar elde ýasalan şekiller, çekilen suratlar bilen öz başarnyklaryny görkezdiler. Bäsleşigiň III şerti boýunça toparlar BMG we onuň tebigaty goramak barada hereket edýän guramalary boýunça sowalnamalaryň üstünde işlediler.
Bäsleşige toparlaryň taýýarlykly gelendikleri aýdyň boldy we netijede Halkara ykdysady gatnaşyklary fakultetiniň I ýyl talyplary I orna, Halkara hukugy fakultetiniň talyplary II we Halkara žurnalistikasy fakultetiniň talyplary III orna mynasyp boldular. Bäsleşigiň ahyrynda toparlar ýokary okuw mekdeplerinde bilim we terbiýe almak ugrunda döredilýän mümkinçilikler üçin Gahryman Arkadymyza, Arkadagly Gahryman Serdarymyza minnetdarlyklaryny bildirler. Şeýle çäreleriň özlerinde uly täsir galdyrýandygyny, gyzyklanmalarynyň artýandygyny nygtadylar.
Maýa ATAJANOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň uly mugallymy.