“Tebigaty goramak – mukaddes borçdyr” atly aýdym-sazly duşuşyk
2023-nji ýylyň 30-njy maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Daşary işler ministrliginiň Halkara gatnaşyklary instituty bilen Türkmenistanyň Tebigaty goramak jemgyýeti bilen bilelikde Aşgabat şäheriniň güni hem-de 5-nji iýun Daşky gurşawy goramagyň bütindünýä güni mynasybetli “Tebigaty goramak – mukaddes borçdyr” atly aýdym-sazly duşuşyk geçirildi. Oňa Türkmenistanyň Tebigaty goramak jemgyýetiniň wagyz-nesihat işleri boýunça hünärmeni Gülnara Çaryýarowa hem-de Türkmenistanyň Daşary işler ministrliginiň Halkara gatnaşyklary institutynyň professor mugallymlary we talyplary gatnaşdylar.
Duşuşykda çykyş edenler türkmen topragynyň ajaýyp tebigatyny gorap saklamak, suw, ýer we biologik serişdelerini rejeli peýdalanmak, howanyň hapalanmagynyň öňüni almak meseleleriniň oňyn çözülmegi adamlaryň saglygynyň goralmagy üçin edilýän uly aladadygy barada durup geçdiler. Seýilgäh we gök zolaklaryň döredilmegi, olaryň meýdanlarynyň giňeldilmegi barada aýdyp, halkymyzyň tebigat bilen sazlaşykly ýaşamak ugrundaky gadymy däpleriniň üstünlikli dowam etdirilýändigini belläp geçdiler.
Duşuşygyň dowamynda institutyň aýdymçylar we tans toparlary hem-de Türkmenistanyň Tebigaty goramak jemgyýetiniň “Türkmen sährasy” döredijilik toparynyň aýdymçylary tansdyr aýdymlary bilen çykyş etdiler.
Duşuşygyň ahyrynda oňa gatnaşyjylar işlemäge, okamaga ähli mümkinçilikleri döredip berýän Arkadagly Serdarymyza, Gahryman Arkadagymyza sag bolsun aýtdylar.
Gülnar ÖRÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň talyby.