Täsirli geçen okuw sapagy
2024-nji ýylyň 9-njy fewralynda Türkmenistanyň Daşary işler ministrliginiň Halkara gatnaşyklary institutynda 2023-2024-nji okuw ýylynyň ikinji ýarymýyllygynyň ilkinji okuw sapagy «Pähim-paýhas ummany Magtymguly Pyragy» ady bilen geçirildi. Okuw sapagyny institutymyzyň Žurnalistikanyň nazaryýeti we amalyýeti kafedrasynyň uly mugallymy, filologiýa ylymlarynyň kandidaty, şahyr Baba Saryýew alyp bardy. Oňa ýokary okuw mekdebimiziň mugallymlarydyr talyp ýaşlary gatnaşdylar.
Magtymgulynyň döredijiligi bilen gyzyklanýan Baba Saryýew açyk sapagyň dowamynda gatnaşyjylara dana şahyryň şygyrlarynda öňe sürülýän watansöýüjilik, ynsanperwerlik ideýalary, olaryň çeperçilik taýdan kämilligi dogrusynda gyzykly gürrüňler berdi. Mundan başga-da, ýurdumyzda we halkara derejede Magtymguly Pyragynyň doglan gününiň 300 ýyllygynyň giňden bellenilýändigi, onuň döredijiliginiň düýpli öwrenilmeginiň ähmiýeti dogrusynda gürrüň edildi. Şeýle gürrüňleriň üstüniň täsirli mysallar, şygyr setirleri bilen ýetirilmegi diňleýjiler üçin has-da ýatda galyjy boldy.
Açyk sapagyň ahyrynda oňa gatnaşan talyplar Magtymguly Pyragynyň ömri we döredijiligi, nusgawy türkmen edebiýaty barada özlerini gyzyklandyrýan sowallar bilen halypa mugallyma ýüzlenip, olara giňişleýin jogap aldylar.
Orazjemal ÇARYÝAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby