TÄSIRLI GEÇEN DÖREDIJILIK DUŞUŞYGY
2022-nji ýylyň 31-nji ýanwarynda Türkmenistanyň Daşary işler ministrliginiň Halkara gatnaşyklary institutynda talyplaryň 2021-2022-nji okuw ýylynyň gyşky dynç alyş möwsümini guramaçylykly geçirmek maksady bilen, Türkmenistanyň halk ýazyjysy Orazguly Annaýew bilen döredijilik duşuşygy geçirildi.
Duşuşygyň dowamynda ýurdumyzyň görnükli ýazyjylarynyň biri bolan Orazguly Annaýew özüniň döredijilik ýoly, döreden kyssa we poeziýa eserleri barada aýdyp, öz döredijiligine täsir eden, türkmen edebiýatyny baýlaşdyrmakda mynasyp goşant goşan halypa we döwürdeş ýazyjy-şahyrlaryny, söz ussatlarynyny ýatlady. Halypa ýazyjy döredijilige gadam basan ýaşlara onuň inçe syrlary, çeper söze erk etmegiň täsin tärleri barada maslahat berdi. Halypa ýazyjy Berkarar döwletimiziň bagtyýarlyk döwründe milli Liderimiziň baştutanlygynda ata Watanymyzda gazanylýan üstünlikleri wasp etmegiň döwrümiziň ýazyjy-şahyrlarynyň, žurnalistleriniň mukaddes borjudygyny nygtap, bu borja Türkmenistanyň Daşary işler ministrliginiň Halkara gatnaşyklary institutynyň talyp ýaşlarynyň hem mynasyp hötde gelýändiklerini belledi.
Şeýle-de duşuşygyň barşynda talyplar edebiýat, poeziýa, publisistika barada özlerini gyzyklandyrýan soraglar bilen halypa ýazyja ýüzlenip, jaýdar we täsirli jogaplary aldylar. Türkmenistanyň halk ýazyjysy Orazguly Annaýewiň her bir berlen soraga giňişleýin jogap berip, olary mysallar, ýatlamalar arkaly berkitmegi ýaşlar üçin has-da täsirli boldy. Duşuşyk aýratyn hem bu ýokary okuw mekdebinde döredijilik bilen meşgullanýan, žurnalistika ugrundan bilim alýan talyplar üçin ýatdan çykmajak waka öwrülip, olaryň söz, sözüň güýji, söze erk etmek sungaty barada gözýetimleriniň giňemegine ýardam etdi.
Şeýle döredijilik duşuşyklarynyň yzygiderli geçirilip durulmagy bolsa, talyplaryň gyşky dynç alyş möwsümindäki boş wagtlaryny netijeli peýdalanmaklaryna, olaryň täze zatlary öwrenmeklerine oňaýly şert döredýär.
Batyrmuhammet ORAZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
I ýyl talyby.