TÄSIRLI DUŞUŞYK GEÇIRILDI
2025-nji ýylyň 15-nji oktýabrynda Türkmenistanyň Daşary işler ministrliginiň Halkara gatnaşyklary institutynda Halkara Gyzyl Haç Komitetiniň Türkmenistandaky wekiliýetiniň başlygy Mihail Rahmanow bilen duşuşyk geçirildi. Oňa institutyň professor-mugallymlary we talyplary gatnaşdylar.
Duşuşykda HGHK-nyň sebitiň çäklerinde, hususan-da, Türkmenistanda häzirki wagtda alyp barýan işleri, Halkara ynsanperwer hukugyny ilerletmek we milli kanunçylyga ornaşdyrmak, şeýle hem Türkmenistanyň Gyzyl Ýarymaý Milli jemgyýeti bilen alnyp barylýan hyzmatdaşlyklary dogrusynda giňişleýin gürrüň edildi. Ýagny, HGHK tarapyndan Türkmenistanyň ugurdaş ýokary okuw mekdeplerinde halkara ynsanperwer hukugy boýunça okuwlary we umumy sapaklary geçirmegiň hem-de halkara ynsanperwer hukugyna laýyklykda Türkmenistanyň kanunçylyk binýadyny kämilleşdirmäge gönükdirilen hyzmatdaşlyklar dogrusynda çykyşlar edildi.
Duşuşygyň dowamynda institutynyň talyplary myhmana özlerini gyzyklandyrýan sowallar bilen ýüzlendiler.
Dürli BALLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk
öwreniş kafedrasynyň uly mugallymy.