Tapawutlanan talyplar sylaglanyldy
2024-nji ýylyň 13-nji dekabrynda Türkmenistanyň Daşary işler ministrliginiň Halkara gatnaşyklary institutynda ýurdumyzda we halkara derejesinde geçirilen bäsleşiklerde, olimpiadalarda baýrakly orunlara mynasyp bolan talyplara hormat hatlary gowşuryldy. Turuwbaşdan işjeň häsiýete eýe bolan çärede «Pähim-paýhas ummany Magtymguly Pyragy» ýylynda akyldar şahyryň hormatyna yglan edilen bäsleşiklerde hem-de halkara derejeli ders olimpiadalarda orun alan talyplar gyzgyn elçarpyşmalar bilen garşylandy. Olar sowgatlar hem-de hormat hatlary bilen sylaglanylyp, geljekde-de şeýle üstünlige eýe bolmaklary arzuw edildi. Duşuşygyň dowamynda tamamlanyp barýan 2024-nji ýylda akyldar şahyrymyz Magtymguly Pyraga bagyşlanyp geçirilen halkara çäreleriň giň gerim alandygy şeýle-de, halkara Bitaraplyk gününiň ýokary derejede bellenilip geçilendigi dogrusynda-da durlup geçildi. Şeýle bäsleşikleriň, halkara ýaryşlaryň, ýokary okuw mekdepleriniň arasyndaky olimpiadalaryň yzygiderli guralmagy, talyp ýaşlaryň okuwa bolan höwesini artyrmakda, zehinli ýaşlary ýüze çykarmakda, saýlap alan kärine ussat hünärmenleri ýetişdirmekde möhüm ähmiýete eýe bolup, bu ugurdaky çäreleriň sanynyň artýandygy has-da guwandyryjydyr.
Baýnazar BAÝHANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.