TALYPLARYMYZYŇ TASLAMASY EÝEÇILIK HUKUGYNY GAZANMAGY BAŞARDY
Golaýda Türkmenistanyň Daşary işler ministrliginiň Halkara gatnaşyklary
institutynyň Halkara gatnaşyklary fakultetiniň II ýyl talyplary Sahydöwlet
Hümmetjumaýew we Şyhdurdy Şyhyýew S.A.Nyýazow adyndaky Türkmen oba
hojalyk uniwersitetiniň guramagynda ýurdumyzyň we daşary ýurtlaryň ýokary
okuw mekdepleriniň talyplarynyň arasynda sanly ulgam arkaly «Durnukly ösüşiň
maksatlaryna ýetmekde ýaşlaryň orny» atly halkara ylmy-taslama bäsleşigine
gatnaşmak üçin «Beýi ýapragynyň we onuň demlemesiniň melhemlik häsiýetleri»
atly ylmy işi taýýarladylar.
Bilşimiz ýaly, 2023-2024-nji okuw ýylynda Türkmenistanyň Oguz han
adyndaky Inžener-tehnologiýalar uniwersitetiniň guramagynda ýurdumyzyň
ýaşlarynyň arasynda geçirilen «Oguztaslama-2024» atly taslama bäsleşiginde
Halkara hukugy fakultetiniň III ýyl talyby Kadyrmyrat Öwezgylyjowyň «FacePay»
ýüz-keşp arkaly töleg» atly ykjam programmasy ikinji orna ýagny, kümüş medala
mynasyp boldy.
Talyplarymyzyň döreden ylmy taslamalaryna emin agzalar ýokary baha
berdiler. Talyplarymyz taslamany Türkmenistanyň Maliýe we ykdysadyýet
ministrliginiň intellektual eýeçilik boýunça Döwlet gullugyna hödürlediler.
Institutymyzyň talyplarynyň döreden ylmy taslamasy kabul edilip, onuň
döredijilerine taslamanyň eýeçilik hukugy berildi.
Türkmenistanda ylym ulgamyny ösdürmegiň 2024-2025-nji ýyllar üçin
Strategiýasy kabul edildi hem-de ylym ulgamyny ösdürmek boýunça toplumlaýyn
işler amala aşyrylýar. Kabul edilen milli we ählumumy derejeli döwlet
maksatnamalaryna laýyklykda, giň gerimli işler alnyp barylýar, birnäçe möhüm
kararlar we çözgütler kabul edilýär. Bu işler ýaşlaryň ylmy başlangyçlaryny
höweslendirmäge, olaryň işjeňleşmegine we durmuşa geçirilmegine goldaw
bermäge, halkara forumlaryna hem-de duşuşyklara, şol sanda daşary ýurtlarda
geçirilýän çärelere gatnaşmaga we ýaş alymlary bilelikdäki hem-de
utgaşyklykdaky taslamalary amala aşyrmaga giňden çekmäge gönükdirilendir.
Türkmenistanyň Daşary işler ministrliginiň Halkara gatnaşyklary
institutynyň Ýaş alymlar geňeşiniň çäklerinde ylmy gurnaklaryň döredilmegi
ýaşlaryň ylymda uly üstünlikleri gazanmagyna itergi berýär.
Talyp ýaşlarymyzyň ylmy bäsleşiklere işjeň gatnaşyp, öz ukyp-
başarnyklaryny ýüze çykarmaklary, ylymda täze üstünliklere ýetmekleri üçin giň
mümkinçilikleri döredip berýän Gahryman Arkadagymyza, Arkadagly Gahryman
Serdarymyza tüýs ýürekden hoşallygymyzy bildirýäris.
Gülsenem HOMMADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we
deňeşdirme hukuk öwreniş
kafedrasynyň mugallymy,
Ýaş alymlar geňeşiniň başlygy.