TALYPLARYMYZYŇ DÜNÝÄ DEREJESINDE SPORT ÜSTÜNLIGI
2023-nji ýylyň 8-10-njy sentýabry aralygynda Özbegistan Respublikasynyň paýtagty Daşkent şäherinde Şotokan karate boýunça ulularyň we ýaşlaryň arasynda 13-nji dünýä çempionaty geçirildi. Oňa beýleki döwletler bilen bir hatarda Türkmenistanyň milli ýygyndy topary hem gatnaşdy.
Ýaryşda türkmen türgenleriniň birnäçesi baýrakly orunlara mynasyp boldular. Has takygy, Milli ýygyndymyzyň düzüminde Türkmenistanyň Daşary işler ministrliginiň Halkara gatnaşyklary institutynyň talyplary hem çykyş edip, baýrakly orunlar bilen watanymyza dolanyp geldiler. Olar Halkara gatnaşyklary fakultetiniň 3-nji ýyl talyby Dawut Nazmyradow 1 altyn, 1 kümüş we 2 bürünç medallara, Halkara ykdysady gatnaşyklary fakultetiniň 1-nji ýyl talyby Rasul Atajanow 1 kümüş we 2 bürünç medallara, Halkara hukugy fakultetiniň 2-nji ýyl talyby Ýusup Garajaýew 1 bürünç medala mynasyp boldular.
Talyp türgenleriniň bu üstünligi ýurdumyzda sporty we bedenterbiýäni ösdürmek üçin Arkadagly Serdarymyz tarapyndan edilýän tagallalaryň nobatdaky miwesidir. Geljekde ýene-de türkmenistanly türgenleriň dünýäniň sport giňişliginde ýaşyl Tugumyzy belentde parlatmaklaryny arzuw edýäris.
Aýşat AŞYROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.