Talyplarymyz “Ýaş gyzlar üçin daşky gurşaw meseleleri” atly okuw maksatnamasyna gatnaşdylar
2024-nji ýylyň 21-nji iýunyndan 26-njy iýuly aralygynda Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary fakultetiniň 4-nji ýyl talyby Akgözel Rasulowa we Halkara ykdysady gatnaşyklary fakultetiniň 3-nji ýyl talyby Ýupar Egirjäýewa, Türkmenistanyň Oguz han adyndaky Inžener-tehnologiýalar uniwersitetiniň Biotehnologiýa we ekologiýa fakultetiniň talyby Gurbangul Sapargeldiýewa we Kiberfiziki ulgamlar fakultetiniň talyby Çynar Garlyýewa “ABŞ-ny öwreniş institutlary” (SUSI) maksatnamasynyň çäklerinde bu ýurduň Waşington ştatynyň Obern şäherinde ýerleşýän Green River kollejinde geçirilen “Ýaş gyzlar üçin daşky gurşaw meseleleri” atly okuw maksatnamasyna gatnaşdylar. Bu bäş hepdelik akademiki başlangyç, olaryň ýolbaşçylyk ukyplaryny ýokarlandyrmak we şahsyýet başarnyklary bilen birlikde daşky gurşawy dolandyrmak endiklerini ösdürmek üçin döredildi.
SUSI maksatnamasy interaktiw synpy çäreleri, diskussiýalary, umumy sapaklary, ussahanalary öz içine alýan dört hepdelik akademiki rezidensiýany öz içine alýan giňişleýin okuw meýilnamasyny hödürledi. Bu meýilnama laýyklykda, gatnaşyjylar liderlik ukyplaryny ösdürmek, jemgyýetçilik hyzmaty, daşky gurşaw meselelerini öwrenmek üçin meýdan saparlary bilen meşgullandylar we şol mümkinçilikler bilen birlikde bu maksatnama gatnaşmak üçin dünýäniň 22 ýurdundan gelen pikirdeş ýaş aýal ýolbaşçylar bilen aragatnaşyk saklamak we aragatnaşyk gurmak üçin platforma bolup hyzmat etdi.
Maksatnamanyň çäklerinde geçirilen çäräniň dowamynda Türkmenistanyň Daşary işler ministrliginiň Halkara gatnaşyklary institutynyň we Oguz han adyndaky Inžener-tehnologiýalar uniwersitetiniň talyplary Jorjtaun uniwersitetine baryp, dünýädäki daşky gurşaw meselelerini çözmekde zenanlaryň ýolbaşçylygyny ara alyp maslahatlaşdylar. Bu sapar pikirlenmäni güýçlendirmek we halkara gatnaşyklary nukdaýnazaryndan daşky gurşaw meseleleri boýunça umumy sapaklary öz içine aldy.
Türkmen ýaşlaryna okamaga, işlemäge, daşary ýurt tejribelerini öwrenmäge uly mümkinçilikleri döredip berýän türkmen halkynyň Milli Lideri, Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak, tutumly işleri elmydama rowaçlyklara beslensin!
Mahym KAKAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň II ýyl talyby.