Talyp joşguny – 2022
2022-nji ýylyň 1-nji iýunynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Magtymguly adyndaky Ýaşlar guramasynyň Merkezi Geňeşiniň hem-de Türkmenistanyň Bilim ministrliginiň bilelikde gurnamagynda ýurdumyzyň ýokary okuw mekdepleriniň arasynda asylly däbe öwrülen «Talyp joşguny – 2022» atly döredijilik festiwaly dabaraly ýagdaýda geçirildi. Döredijilik festiwalyna Halkara gatnaşyklary institutynyň bagtyýar talyp ýaşlary işjeň gatnaşdylar.
«Talyp joşguny – 2022» atly döredijilik festiwalynyň çykyşlary Gahryman Arkadagymyzyň jöwher paýhasyndan dörän kitaplarynyň esasynda taýýarlanyldy. Bu festiwal edebi sazly kompozisiýa, taryhda uly yz goýan şahsyýetlerimiz barada taryhy sahna, çeper okaýyş, institutyň talyp gyzlarynyň taýýarlan «Aşyk zergär» atly tansy, degişme sahnasy, halk döredijiliginden bir parça şeýle-de, institutymyzyň höwesjeň talyplarynyň ýerine ýetirmeginde Watanymyzyň ösüşlerini wasp edýän aýdym bilen utgaşyp, şatlyk-şowhuna beslendi.
Jennet MYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.