“SUNGATLAR SÖHBETLEŞÝÄRKÄ ...”
2023-nji ýylyň 11-nji sentýabrynda Türkmenistanyň Daşary işler ministrliginiň Halkara gatnaşyklary institutynda Halkara gatnaşyklary we diplomatiýa kafedrasynyň professory, sosiologiýa ylymlarynyň doktory Öwezdurdy Muhammetberdiýewiň şahsy sergisi guraldy. Sergä ýurdumyzyň meşhur medeniýet we sungat işgärleri, suratkeşleri, halypa diplomatlar, institutymyzyň professor-mugallymlary, talyp ýaşlary we işgärleri gatnaşdylar. Sergide professor Öwezdurdy Muhammetberdiýewiň dürli ýyllardaky eserleri ajaýyplygy, köpöwüşginliligi, reňkleriň sazlaşygy, çeperçilik taýdan ýokary derejeliligi, şekillendiriş sungatynyň dürli žanrlarda döredilendigi bilen sergä gatnaşanlarda ýakymly täsir galdyrdy. Eserlerde türkmen halkynyň gadymy taryhy we milli aýratynlyklarynyň çeper suratlandyrylmagy ýaş nesillerde watançylyk duýgusynyň kämilleşmegine uly goşant goşdy. Türkmen halkynyň Milli Lideri Gahryman Arkadagymyz “Parahatçylyk sazy, dostluk-doganlyk sazy” atly pähim-paýhasa ýugrulan kitabynda “Sungatlar söhbetleşýärkä, toplaryň sesi çykmaýar!” diýip, örän jaýdar belläp geçýär. Halypa mugallym käri boýunça sosiolog bolmagyna garamazdan, şekillendiriş sungaty bilen meşgullanmagy talyp ýaşlarda sungata bolan höwesi has hem artdyrdy. Türkmen diplomatiýasynyň milli mekdebinde şeýle sergileriň geçirilmegi geljekki halkaraçy hünärmenleriň sungat sowatlylygynyň kämilleşmegine, şekillendiriş sungatyna bolan höwesleriniň artmagyna uly goşant goşýar.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.
Şeýle hem bu barada şu ýerden
okap bilersiňiz: