Sport we bedenterbiýe ýaşlaryň endigine öwrülýär
2023-nji ýylyň 13-nji maýynda Türkmenistanyň Daşary işler ministrliginiň Halkara gatnaşyklary institutynda ýokary ruhubelentlikde dowam edýän «Sagdyn durmuş ýörelgesi — bagtly geljegiň binýady» atly sport hepdeliginiň çäginde sportuň tanap çekmek görnüşi boýunça fakultetleriň oglanlarynyň we gyzlarynyň arasynda ýaryş geçirildi. Olara talyp ýaşlar uly höwes bilen gatnaşdylar.
Sportuň tanap çekmek görnüşi boýunça fakultetleriň arasynda guralan oýnuň dowamynda türgenler çalasyn we ynamly hereketleri bilen sport ussatlyklaryny görkezdiler. Türkmen halkynyň Milli Lideri Gahryman Arkadagymyzyň: «Biziň üçin iň zerur, iň ajaýyp ýol — halkymyzy baky bagta ýetirýän ýoldur. Sport, sagdynlygam şol ýola ýetmegiň iňňän möhüm ugrudyr» diýýän sözlerini ýörelge edinýän talyp ýaşlar ýaryşlarda ýokary netijeleri gazanýarlar.
Ýaryşyň netijeleri boýunça oglanlaryň arasynda toparlaýyn I orna Halkara gatnaşyklary, II orna Halkara ykdysady gatnaşyklary, III orna Halkara žurnalistikasy, gyzlaryň arasynda hem toparlaýyn I orna Halkara gatnaşyklary, II orna Halkara ykdysady gatnaşyklary, III orna Halkara žurnalistikasy fakultetleriň talyplary mynasyp boldular.
Sport hepdeliginiň dowamynda geçirilýän ýaryşlarda sport bilen çynlakaý meşgullanýan ýaşlaryň az däldigini bilmek bolýar. Olar bedenterbiýäni we sporty öz endiklerine öwürýärler. Munuň özi talyp ýaşlaryň diňe bir beden taýdan berkemegine däl-de, eýsem, öz erk-isleglerini pugtalandyrmaga, islendik çylşyrymly ýagdaýlary ýeňip geçmäge, erjel we tutanýerli bolmaga, ylym-bilimini has-da kämilleşdirmegine ýardam berýär.
Selbi HOJALYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.