SÖWDA-SENAGAT EDARASYNDA SENAGATÇYLAR WE TELEKEÇILER BIRLEŞMESINIŇ DÖREDILMEGINIŇ 16 ÝYLLYGY MYNASYBETLI GURALAN SERGI
2024-nji ýylyň 17-nji martynda Türkmenistanyň Söwda-senagat edarasynda Senagatçylar we telekeçiler birleşmesiniň döredilmeginiň 16 ýyllygy mynasybetli guralan sergi öz işine başlady. Sergide Türkmenistanyň obasenagat toplumynda, senagat ulgamynda, himiýa önümçiliginde, söwda hem-de hyzmatlar pudagynda, milli senetçilikde, haly önümçiliginde iş alyp barýan kärhanalaryň önümleri görkezilýär. Mundan başga-da, Türkmenistanyň Senagatçylar we telekeçiler birleşmesiniň döredilmeginiň 16 ýyllygy mynasybetli birleşmäniň agzalarynyň ýörite maslahaty hem guraldy.
Serginiň we maslahatyň açylyş dabarasy aýdym-sazly medeni çykyşlara beslendi. Onuň barşynda Hormatly Prezidentimiz Serdar Berdimuhamedowyň Türkmenistanyň Senagatçylar we telekeçiler birleşmesiniň döredilmeginiň 16 ýyllygy mynasybetli ýurdumyzyň senagatçylarynyň we telekeçileriniň sergisiniň hem-de birleşmäniň agzalarynyň maslahatynyň öz işine başlamagy mynasybetli Gutlag haty okaldy.
Her ýylda geçirilmegi däbe öwrülen sergi hususy pudagyň alyp barýan öndürijilikli hem-de döwrebap işini köpçülige ýetirmekde, täze önümler bilen tanyşdyrmakda, şeýle-de söwda-ykdysady gatnaşyklarda işewürlik hyzmatdaşlygynyň täze ugurlarynyň açylmagyna giňden ýardam eder. Bu giň gerimli sergi 19-njy marta çenli öz işini dowam eder.
Resul GYLYJOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň III ýyl talyby.