“SOSIAL MEDIA WE BIZ” ATLY ÝÖRITELEŞDIRILEN OKUW SAPAGY
2024-nji ýylyň 21-nji dekabrynda Türkmenistanyň Daşary işler ministrliginiň Halkara gatnaşyklary institutynda “Gujurly nesil” bilim merkezi tarapyndan ýaş nesilleriň sosial torlardan dogry peýdalanmaklygy we gündelik durmuşda interneti nähili ulanmalydygy barada “Social media we Biz” atly ýöriteleşdirilen okuw sapagy geçirildi. Okuw sapagyny “Gujurly nesil” bilim merkeziniň maslahatçysy Sylap Ataýew alyp bardy.
Okuw sapagyň dowamynda bilermen häzirki wagtda sosial ulgamyň adam durmuşynyň möhüm we ähmiýetli bölegine öwrülendigi sebäpli, diňe ýaşlaryň arasynda meşhurlyga eýe bolman, eýsem, çagalaryň hem ünsüni özüne çekýändigi, olaryň sosial ulgamlardan aşa köp peýdalanmagy bilen köp mukdarda maglumatlary öwrenmek we özleşdirip bilmek ukybynyň peselmegine getirýändigi, soňky ýyllarda ýaşlar “janly” aragatnaşyk endiklerini ýitirýändikleri, şeýle-de işjeňlik, uky, görüş, oňurga we aşa semizlik, fiziki we ruhy saglygy bilen baglanyşykly meseleleriň ýüze çykýandygy barada durmuşdan dürli mysallar arkaly düşündirip, sosial torlaryň zyýanlary barada belläp geçdi. Şeýle-de internetden we sosial ulgamdan dogry peýdalanmak barada ýaşlara birnäçe maslahatlary berdi.
Talyplar okuw sapagyň dowamynda özlerine gerekli maglumatlary aldylar we bilermene sosial torlar barada özlerini gyzyklandyrýan soraglary berdiler.
Gülaýym BAKYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň I ýyl talyby.